Қўшимча функционаллар
-
Тунги кўриниш
Полша Ўзбекистонда аҳолини фавқулодда вазиятда огоҳлантириш бўйича тажриба лойиҳасини амалга оширади
Ўзбекистоннинг Полшадаги элчихонасида Digitex компанияси вице-президенти Леонид Билецкий билан музокаралар бўлиб ўтди, деб хабар бермоқда “Дунё”.
Полша томони жорий йил 27-28 апрель кунлари мамлакат пойтахтида ўтказилган 2-Тошкент халқаро инвестиция форумига таклиф этилгани ҳамда ҳамкорлик бўйича саъй-ҳаракатларни қўллаб-қувватлаётгани учун дипмиссияга миннатдорлик билдирар экан, Ўзбекистонда бундай кенг қамровли сармоявий анжуманнинг уюштирилиши Полша томони учун қувонарли ҳол бўлганини қайд этди.
Музокаралар чоғида ўзаро ҳамкорликни ривожлантириш билан боғлиқ масалалар мулоқотнинг асосий мавзуси бўлди. Жумладан, компания вице-президенти огоҳлантириш тизимига эҳтиёж бўлган объектлар учун бевосита масъул бўлган Тоғ-кон саноати ва геология вазирлиги билан ҳамкорликда тажриба лойиҳаларини амалга ошириш таклифини илгари сурди.
Полша томони компания ускуналари ва ечимларини тақдим этиш ҳамда тажриба лойиҳасини амалга ошириш учун Фавқулодда вазиятлар вазирлиги ҳамда Тоғ-кон саноати ва геология вазирлиги билан видеомулоқот ўтказишни режалаштирилаётганини маълум қилгани ҳолда бу борада элчихонадан тегишли кўмак кўрсатилишини сўради.
Ўзбекистон элчихонаси маълумотига кўра, 38 йилдан ортиқ тажрибага эга бўлган Digitex компанияси аҳолини огоҳлантириш сигналлари тизимларини ишлаб чиқариш бўйича дунёдаги етакчилардан бири ҳисобланади.
