Қозоғистон АҚШ ва Россиянинг Никита Кислицинни экстрадиция қилиш бўйича сўровларини ўрганади

Қозоғистон 22 июнь куни қўлга олинган F.A.C.C.T. IT-компанияси (собиқ Group-IB) ходими Никита Кислицинни экстрадиция қилиш бўйича АҚШ ва Россия сўровларини ўрганади. Бу ҳақда 29 июнь, пайшанба куни бир қатор ОАВ Қозоғистон бош прокурори ўринбосари Улан Байжановга таяниб хабар берди.

Унинг таъкидлашича, ҳозир Қозоғистон томони Кислицин айнан нимада айбланаётганини аниқлаш мақсадида АҚШга сўров юбормоқда. Шундан сўнг, мамлакат бу Қозоғистонда жиноят эканлигини таҳлил қилмоқчи. «Шундагина биз экстрадиция бўйича қарор қабул қиламиз. Агар у (Кислицин) бошпана сўраб мурожаат қилса, у кечиктирилади. Биз буни ҳал қиламиз», - дея Байжанов сўзларини келтирган «Интерфакс».

Айни пайтда, Россиянинг бир қатор оммавий ахборот воситалари, жумладан, «Ведомости» газетаси ва РИА «Новости» давлат ахборот агентлиги ҳам Қозоғистон бош прокурори ўринбосарига таяниб, Россия сўрови Америка сўровидан устун бўлишини ёзган. «Ҳеч қандай устуворлик ҳақида гап йўқ, биринчи навбатда бу - фуқаролик. Бу ҳолатда биринчи ўрин Россия томонига тегишли. Лекин биз у айбланаётган барча қилмишлар, жумладан, Россияда жиддий эканлигига ишонч ҳосил қилишимиз керак», - дея Байжанов сўзларини келтирган журналистлар. 

28 июнь куни Қозоғистонда F.A.C.C.T киберхавфсизлик компанияси ходими Никита Кислицин 22 июнь куни қўлга олингани маълум бўлди.

2006 йилдан 2012 йилгача Кислицин дастурлаш ва ахборот хавфсизлиги масалаларига бағишланган «Хакер» журналининг бош муҳаррири бўлган. 2012 йил апрель ойида у АҚШга жўнаб кетди ва кибертаҳдид бўйича мустақил тадқиқотчи сифатида ишлай бошлади. 2013 йил январь ойида Кислицин Иля Сачков асос солган Group-IB’да иш бошлади. Сачков 2021 йил сентябрида давлатга хиёнат иши бўйича ҳибсга олинган эди. Тергов уни «давлат сирини ташкил этувчи маълумотларни хорижий давлатга топширган» деб ҳисобламоқда. Сачков айбини тан олмади ва «ФСБ»ни таъқиб қилишда айблади.