Нидерландия қироли мамлакатнинг қуллар савдосидаги роли учун узр сўради

Виллем-Александр нидерланд колонияларида қуллик бекор қилинганининг 150 йиллиги муносабати билан ўтказилган расмий маросимда: “Асирликнинг барча турларидан энг хўрловчиси қулликдир”, деди.

Фото: Remko de Waal/ANP/AFP/Getty Images

Нидерландия қироли Виллем-Александр 1 июл, шанба куни Амстердамда нидерланд колонияларида қуллик бекор қилинганининг 150 йиллигига бағишланган расмий маросимда ўз мамлакатининг ўтмишда қўлланган қул савдосига аралашгани учун расман узр сўради.

56 ёшли монарх таъкидлаганидек, бу мавзу "унга шахсан ва жуда кучли таъсир қилади". "Асирликнинг барча шакллари ичида қуллик энг ҳақоратли, энг хўрловчисидир", деб қўшимча қилди Виллем-Александр. “Нидерландия радиоэшиттириш корпорацияси” (NOS) хабарига кўра, у ота-боболари бундай тизимга қарши чиқмагани учун узр сўраган.

Аввалроқ, 2022 йил декабр ойида Нидерландия бош вазири Марк Рютте қироллик ҳукумати номидан ўз мамлакатининг қул савдосига аралашгани учун расман узр сўраган эди. Ўтмишда нидерланд колонияларида амалда бўлган қулликни у бир вақтнинг ўзида "инсониятга қарши жиноят" деб атаган. Виллем-Александр ўз фуқароларига Рождество мурожаатида Рюттенинг ушбу нутқини олқишлади.

16-17-асрларда нидерланд қул савдогарлари Африкадан 600 мингга яқин одамни Жанубий Америка ва Кариб денгизига олиб кетган. 17-асрда Нидерландия дунёдаги энг йирик мустамлакачи давлатлардан бири эди. Сўнгги йилларда нидерланд жамиятида мамлакат шаҳарлари ва музейларининг бойлиги кўпроқ унинг мустамлакачилик ўтмиши билан боғлиқлиги борасида фикр пайдо бўляпти, деб таъкидлайди dpa агентлиги.

Бошқа йирик мустамлакачи давлатлар – Буюк Британия, Испания, Белгия монархлари қулдорлик сиёсатини қоралаган бўлса ҳам, бунинг учун ҳам, мустамлакачилик сиёсати учун ҳам узр сўрамаган.