Она қизига буйрагини берди — БМТМда илк бор кичик ёшли болага буйрак кўчириб ўтказилди

Тошкент шаҳридаги Болалар миллий тиббиёт марказида илк марта кичик болага буйрак трансплантацияси ўтказилди. Бу ҳақда Соғлиқни сақлаш вазирлиги хабар қилди.

Операция 12 июлда ўтказилган. Уни трансплантолог Аҳрор Сафаров амалга оширган. Таъкидланишича, бемор айни дамда ўзини яхши ҳис қиляпти. Амалиёт қиз ва онасида 3 соатдан давом этган.

Шифокорнинг айтишича, бундай амалиётда донор буйрагининг ўлчами муҳим аҳамиятга эга. “Чунки болалар кичкина, уларга буйракни жойлаштириш масаласида ҳам бош қотириш керак бўлган жиҳатлар бор”, – дейди у.

Маълум бўлишича, дастлабки олинган натижалар ёмон эмас. Шифокорлар кўчириб ўтказилган буйракнинг яшаб кетиш йилини ошириш устида бош қотиришяпти.

“Энди яна ҳам ёшроқ, 3,5 ёшгача бўлган болага буйрак кўчириш учун тайёрланяпмиз. Унга отаси донор бўлади”, – дейди шифокор.

Маълумот учун: Ўзбекистонда 250га яқин болалар буйрак кўчириш амалиётга муҳтож бўлиб қоляпти. Унгача улар гемодиализ муолажасини олиб туришади, бу муолажа тўлиқ давлат томонидан молиялаштирилиши белгиланган.