Ўзбекистон бўйлаб минглаб бемор болаларни даволаш жараёнлари бошланди

Қурбон ҳайити муносабати билан 10 минг нафар болада жарроҳлик амалиёти ўтказиш бўйича президент қарорида белгиланган вазифалар ижроси бошланди. Соғлиқни сақлаш вазирлиги хабарига кўра, тегишли ваучерлар топширилган беморлар босқичма-босқич тиббиёт муассасаларига жойлаштирилиб, соғломлаштирилмоқда.

Президент қарорида 10 минг боладан ташқари, онкогематологик ташхис қўйилган қарийб 2300 кишида ҳам жарроҳлик амалиётлари ўтказиш, яна 350 кишида буйрак ва жигар трансплантациясини амалга ошириш кўзда тутилган.

Тиббий текширув ва даволаш харажатлари давлат мақсадли жамғармалари ва бошқа манбалардан ажратилган маблағлар ҳисобидан, “Вақф” хайрия жамоат фонди орқали молиялаштирилмоқда.

“Биргина шу ҳужжат асосида бажариладиган эзгу ишлар 10 мингта болани соғлом ҳаётга қайтариши — жуда катта натижа. Эътиборлиси, бу имкониятдан фойдаланувчи бемор болалар камбағал ёки эҳтиёжманд оила фарзандлари бўлиши шарт эмас. Яъни улар ижтимоий ҳолатидан қатъи назар даволанадиган бўлди”, – дейилади ССВ матбуот хизмати хабарида.

Қайд этилишича, жойларда оғир хасталик билан курашаётган беморларга бепул операция ваучерлари топширилиб, улар босқичма-босқич тиббиёт муассасаларига жойлаштирилмоқда.

Ушбу хайрли ташаббус 20 йилдан буён буйрак етишмовчилигидан азият чекаётган Темур Ҳакимов хонадонига ҳам қувонч олиб кирди.

Елена Ҳакимова, беморнинг онаси:

— Ҳозир жуда қаттиқ ҳаяжондаман. Чунки етти йилдан бери тинч ухлаганимиз йўқ, жуда катта қийинчиликларни бошдан кечирдик. Шунинг учун бу операция имконияти бизга катта умид ва қувонч берди. Президентимизга оиламиз номидан катта раҳмат айтамиз.

Оғир хасталик нафақат инсон танаси ва руҳияти, балки унинг яқинларини ҳам синовдан ўтказади. Буйрак етишмовчилиги сабаб 7 йилдан буён гемодиализ муолажасини олиб келаётган Темур Ҳакимов учун трансплантация амалиёти – ҳаётни қайтадан бошлаш имкониятидир. У тез ёрдам машинасида академик В. Воҳидов номидаги Республика ихтисослаштирилган хирургия илмий-амалий тиббиёт марказига жойлаштирилди. Эндиликда унга буйрак кўчириб ўтказилади.

Пойтахтлик Нигора Ибрагимова ҳам бир неча йилдан буён сурункали буйрак етишмовчилиги билан оғриётган мурғак фарзандининг оғир дарди билан курашиб келмоқда. Унинг ўғли Мустафо буйрак трансплантацияси учун Болалар миллий тиббиёт марказига жойлаштирилиб, зарур муолажалар бошлаб юборилди.

Нигора Ибрагимова, беморнинг онаси:

— Фарзандим туғма буйрак етишмовчилиги билан дунёга келган. Қурбон ҳайити муносабати билан президентимиз томонидан ажратилган ваучер бизга топширилди. Бу биз учун жуда катта ёрдам бўлди. Айниқса, аввал донор билан боғлиқ харажатлар оилалар учун оғирлик қиларди. Ҳозир эса бу масала ҳам ваучер доирасига киритилгани бизга катта енгиллик берди. Бундан жуда хурсандмиз.

Кумушбиби Ғанишерова эндига 11 ойни тўлдирди. Сирдарё вилоятидан. Туғма юрак нуқсони ташхиси қўйилган. Президент қарори билан ажратилган маблағлар бу қизалоқнинг ҳам соғлом ҳаётга қайтиши учун имконият бўлди.

Сожида Ўролова, беморнинг онаси:

— Охирги пайтларда фарзандим жуда қийналди. Бутун оиламизнинг ҳаловати йўқолди. Қизим бир неча марта реанимацияга ҳам тушиб қолди. Шифокорлар операция қилиш кераклигини айтишганди. Президентимиз қарори қабул қилингандан кейин ҳаммаси осон кечди. Амалиёт 40 дақиқа давом этди. 15 дақиқа ўтиб, қизимни бағримга беришди. Шукр, мана ҳозир аҳволи яхши. Президентимизга жуда катта раҳмат. Биз каби оналар доимо у кишини дуо қиляпмиз.

“Вақф” хайрия жамоат фондининг Юнусобод туманидаги вакили Баҳодир Муҳаммадиев мазкур ташаббуснинг кўламига баҳо берди:

— Қурбон ҳайити арафасида муҳтарам Президентимизнинг ушбу ташаббуси бемор болажонларимиз, уларнинг яқинлари учун катта хурсандчилик бўлди. Бу – юртимиз тарихида сўнгги 35 йилда кузатилмаган эзгу ташаббуслардан бирига айланди. “Вақф” хайрия жамоат фонди орқали ваучерлар асосида ҳақиқий эҳтиёжманд ва бемор инсонларга манзилли ёрдам етказилади. Энг муҳими, бу кўмак бир марталик эмас, балки йил бўйи давом этади.