Буюк Британия, Япония, Италия ва Коста-Рика ХЖС прокурори Карим Хон ва судьяларининг Россияда жиноий таъқиб қилинишидан хавотирда.
Буюк Британия, Коста-Рика, Италия ва Япония 7 август, душанба куни қўшма баёнот бериб, унда Россияда Халқаро жиноий суд (ХЖС) прокурори Карим Хонга, шунингдек, ХЖСнинг уч судьясига нисбатан жиноий иш қўзғатилишидан чуқур хавотир билдирди.
«Суд ўз иштирокчи-давлатларининг бутун халқаро ҳамжамиятни ташвишга солаётган энг оғир жиноятлар учун жавобгарликни таъминлаш мажбуриятини билдиради. Россия суднинг мандатига путур етказишда давом этаётганидан афсусдамиз ва биз суд томони, унинг мансабдор шахслари ва ходимлари, шунингдек, у билан ҳамкорлик қилувчи шахслар бошқа иштирокчи-давлатлар билан биргаликда қолишга қатъиятимизни яна бир бор таъкидлаймиз», дейилади Буюк Британия ҳукумати сайтида эълон қилинган баёнотда.
2023 йилнинг март ойида ХЖС Россия президенти Владимир Путинни, шунингдек, Россия болалар омбудсмани Мария Лвова-Беловани украиналик болаларни Россияга ноқонуний олиб чиқиб кетиш иши бўйича ҳибсга олишга ордер берди, бу ҳарбий жиноятлар тоифасига киради. Шундан сўнг, Россия Тергов қўмитаси (ТҚ) Халқаро жиноий суд (ХЖС) прокурори Карим Аҳмад Хон (Буюк Британия), шунингдек, судьялар Томоко Аканэ (Япония), Росарио Салваторе Айтала (Италия) ва Серхио Херардо Угалде Годинесга (Коста-Рика) нисбатан жиноий иш қўзғатди.
«Коммерсант» газетасининг ёзишича, Россияда Карим Аҳмад Хонга нисбатан айбсизлиги маълум бўлган шахсни жиноий жавобгарликка тортиш, шахсни оғир ёки ўта оғир жиноят содир этганликда қонунга хилоф равишда айблаш моддалари, шунингдек, халқаро муносабатларни мураккаблаштириш мақсадида халқаро ҳимоядан фойдаланаётган хорижий давлат вакилига ҳужум қилишга тайёргарлик кўриш бўйича иш қўзғатилган.
