12:05 / 09.08.2023
9870

Ҳарбий хизматдан бош тортганлар ҳаракати Нобел мукофотига номзод сифатида кўрсатилди

Халқаро тинчлик бюроси Россия, Беларус ва Украина ташкилотларини тинчлик учун Нобел мукофотига ҳарбий хизматдан бош тортганлар ва дезертирларга ёрдам бераётгани учун номзод қилиб кўрсатди. 

Фото: britannica.com

«Биз учун ақл бовар қилмайдиган шараф», - Россиянинг «Ҳарбий хизматдан воз кечганлар ҳаракати» (ҲВҲ) 8 август, сешанба куни Халқаро тинчлик бюроси ташкилотни тинчлик учун Нобел мукофотига номзод қилиб кўрсатгани ҳақидаги хабарга шундай изоҳ берди. Бу ҳақда ҲВҲ Telegram’даги саҳифасида хабар жойлаштирди. 

Умуман олганда, Халқаро тинчлик бюроси (ХТБ) дезертирлар ва ҳарбий хизматдан бош тортганларга ёрдам бериш билан шуғулланадиган учта ташкилотни Нобел тинчлик мукофотига номзод қилиб кўрсатди. Мукофотга «Ҳарбий хизматдан воз кечганлар ҳаракати» билан бир қаторда, Беларуснинг «Бизнинг уй» ташкилоти ва Украинанинг тинчлантирувчи ҳаракати ҳам кўрсатилган. 

Халқаро тинчлик бюроси веб-сайтидаги баёнотга кўра, ҳар учала «ажойиб ташкилот» ҳам «виждонан ҳарбий хизматдан воз кечиш ҳуқуқига алоҳида эътибор беради». Шу билан бирга, ушбу ташкилотлар ўз саъй-ҳаракатида «мисли кўрилмаган маҳорат ва фидойилик кўрсатди», айниқса Украина уруши 2022 йил 24 февралда бошланганидан кейин», - дейилади баёнотда. 

Ҳарбий хизматдан бош тортиш ҳуқуқи ҳатто уруш пайтида ҳам ажралмас жиҳатдир 

Шу билан бирга, Халқаро тинчлик бюроси ҳарбий хизматдан виждонан воз кечишнинг асосий ҳуқуқи инсоннинг ажралмас ҳуқуқи бўлиб, фикрлаш, виждон ва дин эркинлиги ҳуқуқи билан ҳимоялангани ҳамда Фуқаролик ва сиёсий ҳуқуқлар тўғрисидаги халқаро пакт (ФСҲХП)нинг 18-моддаси билан кафолатланганини таъкидлади. «Ушбу ҳуқуқ фавқулодда вазиятларда ҳам ажралмас бўлиб қолади, бу ҳақда ФСҲХПнинг 4-моддаси 2-қисмида аниқ кўрсатилган. Виждонан ҳарбий хизматдан воз кечиш тинчликни таъминлашнинг ўзига хос воситасидир, шунинг учун уруш вақтида инсоннинг ушбу асосий ҳуқуқига алоҳида эътибор қаратиш ва ҳимоя қилиш керак» , - дея маълум қилди Халқаро тинчлик бюроси. 

ҲВҲ нима билан шуғулланади? 

«Ҳарбий хизматдан воз кечганлар ҳаракати» Россия бўлими халқаро ташкилотнинг тинчлик бўйича Нобел мукофотига номзод сифатида кўрсатилиши қарорини олқишлади. «Биз учун ақл бовар қилмайдиган шараф», — деб ёзди чақирилувчиларга ҳарбий хизматдан қочишга ёрдам берувчи ҳаракат раҳбарияти Telegram’да. 

Ҳарбий хизматдан виждонан воз кечганларнинг ҳаракати россиялик ҳарбий хизматчиларга маънавий ва ҳуқуқий ёрдам беради. Украина уруши бошланганидан бери ташкилот жанговар ҳаракатларда қатнашишдан бош тортган фуқароларга фаол ёрдам бермоқда. 2023 йил май ойи бошида унинг веб-сайти РФ Қуролли кучларини «обрўсизлантиргани» туфайли Москванинг Савеловский суди қарори билан блокланган. 23 июнь куни Россия Адлия вазирлиги ҲВҲни «чет эл агенти» деб эълон қилди. 

Top