Италиялик қўшиқчи Тото Кутунио 80 ёшида вафот этди.
Ansa агентлиги хабарига кўра, мусиқачи Миландаги Сан-Раффаэле шифохонасида оламдан ўтган.
Артистнинг менежери Данило Манкузо Кутунио узоқ вақтдан буён хаста бўлгани ва сўнгги ойларда аҳволи оғирлашганини маълум қилган.
Салваторе «Тото» Кутунио 1943 йил 7 июлда Тосканадаги Фоздиново шаҳрида туғилган.
У ўз фаолиятини композитор сифатида бошлаган. 1970-йилларда қўшиғи таниқли француз қўшиқчиси Жо Дассен томонидан ижро этилиши унга муваффақият келтиради. У Адриано Челентано, Мирей Мате, Далида каби машҳурлар ҳамда Ricchi e Poveri гуруҳи билан ҳам ҳамкорлик қилиб, улар учун мусиқа басталаган.
1970-йиллар охирида Кутунио ўзининг яккахон поп-карьерасини бошлаган. 1980 йилда у Сан-Ремодаги мусиқа танловида «Solo noi» қўшиғи билан иштирок этиб, ғолиб бўлади. Уч йил ўтиб у «Lʼitaliano» композицияси билан конкурсда қатнашади ва бу қўшиқ унга оламжаҳон машҳурлик келтиради. 1990 йилда Кутунио «Insieme: 1992» композицияси билан «Евровидение» конкурсида ғолиб чиққан.
