«Россияда Путин ортида турмаган воқеалар камдан кам бўлади». Байден — Пригожиннинг самолёти ҳалокати ҳақида

АҚШ президенти Жо Байден журналистлар билан суҳбатда «Вагнер» ХҲК асосчиси Евгений Пригожиннинг ўлими тафсилотларидан бохабар эмаслигини билдирди.

«Нима бўлганини аниқ билмайман, аммо мен ҳайрон бўлганим йўқ», — деган Байден. Журналистларнинг самолёт ҳалокатига Владимир Путин алоқадор деб ҳисоблайсизми, дея берган саволига АҚШ президенти шундай жавоб берган: «Россияда Путин ортида турмаган воқеалар камдан кам бўлади. Менда жавоб бериш учун етарли маълумот йўқ».

• 23 август куни кечқурун «Вагнер» ХҲК асосчиси Евгений Пригожинга тегишли бўлган самолёт Твер области ҳудудида қулаб тушди. Росавиация маълумотларига кўра, бизнесмен ва хусусий ҳарбий компания командири Дмитрий Уткин ҳам самолёт йўловчилари қаторида қайд этилганди.
• Хусусий ҳарбий компанияга яқин ҳисобланган Grey Zone телеграм-канали ҳам Пригожин ва Уткин ҳалок бўлганини тасдиқлаган. Ёлланма жангчиларга алоқадор бошқа бир канал эса Пригожиннинг тақдири ҳақида текширилмаган маълумотларни тарқатмасликка чақирган.
• Пригожиннинг самолёти ҳалокати вагнерчиларнинг якунланмай қолган исёнидан роппа-роса икки ой ўтиб рўй берди.
• «Интерфакс» маълумотига кўра, Пригожиннинг бизнес-жети қулаган жойда қидирув ишлари якунланган. Самолёт бортида бўлган барча 10 кишининг жасадлари қолдиқлари топилган.