Путин Россияда ёнилғи билан боғлиқ вазиятга тезкор реакция билдиришга чақирди

Россия президенти Владимир Путин ҳукуматга компаниялар ёнилғи бозоридаги нархлар билан боғлиқ вазият учун ўз жавобгарлигини тушуниши учун улар билан ишлашни кучайтиришни топширди.

«Биз нима учун бу содир бўлаётганини биламиз. Нефт нархи билан боғлиқ ҳолда ҳам билганмиз, улар кейин нима бўлишини тушуниб етди, бу биринчи марта эмас. Нархлар кўтарилмоқда, компаниялар [ёнилғи] жўнатиш орқали максимал фойда олишни хоҳлайди. Ҳаммаси тушунарли. Улар ўз ишини қилади, биз эса ўзимизникини, ҳукумат бошқа ишни бажариши керак», — деди Путин вазирлар маҳкамаси аъзолари билан учрашувда. 

Россия президенти бензин ва дизел ёнилғиси нархларининг ўсиши давом этаётганига эътибор қаратди. «Шунинг учун биз [вазирлар маҳкамаси томонидан] таклиф этилаётган чора-тадбирлар самара беришига умид қиламиз, аммо компаниялар ҳам ўз масъулиятини тушуниши учун улар билан яқинроқ ишлашимиз керак», — деди Путин.

Компанияларга эҳтиёткорлик билан муносабатда бўлиш керак, лекин улар ҳозирги воқеаларга тезроқ реакция билдириши лозим, дея хулоса қилди у.

Бундан ташқари, Путин санкцияларга иқтисодий фаолият иштирокчиларига кенгроқ эркинликлар бериш орқали жавоб қайтариш мумкинлигини қайд этди.

Ўз навбатида, бош вазир ўринбосари Александр Новак Россия ҳукумати нефт маҳсулотлари экспорти учун божни олиб сотарларга бир тоннага 20 минг рублдан 50 минг рублгача оширишни таклиф қилаётганини айтди.

«Иккинчидан: чайқовчиларнинг ички бозордан ёнилғи олиб чиқишига йўл қўймаслик учун хуфиёна экспортни чеклаш, бу, биринчи навбатда, нефт маҳсулотлари ишлаб чиқарувчиси бўлмаган, лекин уларни экспорт учун сотиб олган олиб сотарлар учун божларни оширишга тегишли. Биз ҳимоя божини жорий қиламиз, уни 20 минг рублдан 50 минг рублгача оширамиз», — деди Новак Россия президенти Владимир Путиннинг вазирлар маҳкамаси аъзолари билан учрашувида.

Бош вазир ўринбосари ички бозорда харид қилинган нефт маҳсулотларини экспорт қилишни бутунлай тақиқлаш мумкин, деб ҳисоблашини таъкидлади. 

21 сентябр куни Россия ҳукумати ички бозорни барқарорлаштириш мақсадида бензин ва дизел ёнилғиси экспортига вақтинчалик тақиқ жорий қилди.