26 сентябр куни Ироқнинг Найнав вилояти Баҳдид шаҳридаги тўйхонада содир бўлган даҳшатли ёнғин оқибатида 120 киши ҳалок бўлиб, 200 дан ортиқ одам куйиш жароҳати билан касалхонага тушди. Аввалига келин-куёв ҳам қурбонлар орасида бўлгани айтилганди, аммо кейинчалик улар тирик қолгани маълум бўлди.
27 ёшли куёв Реван ва 18 ёшли келин Ханин журналистларга кичик интервю ҳам беришди. Тўғрироғи, интервюда фақат куёв гапирган: «Биз ҳозир қаршингизда турибмиз, аммо ишонинг, фақат танамиз тирик қолди холос. Руҳан биз ҳам ўлиб бўлдик», дейди куёв.
Унинг айтишича, хотини ёнғин оқибатида оиласининг 10 нафар аъзосини йўқотган: онаси, уч акаси, ҳамма амакилари, ёш амакиваччалари. Куёвнинг онаси ҳам фожиа оқибатида ҳалок бўлган.
Куёв келинни қандай қутқарганини айтиб берди: «Уни кўтариб ошхона орқали ташқарига олиб чиқмоқчи бўлдим. Талатўпда ҳамма ташқарига чиқишга уриниб, уни босиб ўтиб кетишди, шу сабаб оёқлари жароҳатланган. Шундай бўлса-да, ташқарига чиқа олдик», дейди Реван.
Тармоқда тўйдаги ёнғин қандай бошлангани акс этган кадрлар тарқалди. Улар сифатли эканидан тўйни суратга олиш учун келган операторлар камерасида олинганини билиш мумкин. Видеоларда келин-куёв рақс тушаётганда атрофида фейрверклар ёқилгани, улардан бири шифтдаги пардага теккач, ёнғин бошланганини кўриш мумкин.
Бошқа қадрларда эса тўйхонада ўтирган мингга яқин одам жонҳолатда ташқарига отилгани кўринади. Эшикка яқин ўтирган одамлар тезроқ ташқарига чиқа олган. Тўйхона ичкариси мато ва пардаларга тўла бўлгани, дастурхонлар ҳам матодан тикилгани учун аланга жуда тез тарқалган.
