Испанияда каталониялик айирмачиларга амнистия эълон қилиниши мумкин

Мухолифат партиялари амалдаги режаларга қарши митинг ўтказди. Испания бош вазири Санчес каталониялик айирмачиларга амнистия эълон қилмоқчи. У амнистиядан ҳокимиятни сақлаб қолиш учун фойдаланишда айбланмоқда.

Фото: Emilio Morenatti/AP/picture alliance

Барселонада ўн минглаб одамлар Испания амалдаги сўл ҳукуматининг каталониялик сепаратистлар раҳбарларини амнистия қилиш ҳақидаги ваъдасига қарши чиқди. 8 октябр, якшанба куни шаҳар марказида ўтказилган митингда Испаниянинг мухолиф консерватив Халқ партияси етакчиси Алберто Нунес Фейхоо ва ўнг қанот популистик Vox партияси раҳбари Сантяго Абаскал иштирок этди.

Испаниянинг амалдаги бош вазири Педро Санчес парламентда янги коалиция тузиш учун Каталония айирмачи партиялари қўллаб-қувватлаши мақсадида кўриб чиқаётган амнистия демократияга зид, деди Фейхоо акция бошланишидан олдин. Намойиш минтақанинг Испаниядан ажралиб чиқишига қарши курашиш мақсадида ташкил этилган «Каталония фуқаролик жамияти» ташкилоти томонидан ўтказилди. У 300 мингга яқин иштирокчи, Барселона полицияси эса 50 мингга яқин иштирокчи ҳақида хабар берди.

23 июл куни Испанияда бўлиб ўтган парламент сайловларида Санчес бошчилигидаги Испания социалистик ишчилар партияси Халқ партиясидаги консерваторларга устунликни бой бериб, иккинчи ўринни эгаллади. Қирол Фелипе VI Халқ партияси етакчиси Фейхоога коалиция тузишни ишониб топширди, бироқ унинг номзоди парламент қуйи палатаси томонидан кичик фарқ билан рад этилди. Энди Санчесга коалиция тузиш вазифаси қўйилган.

Каталония партиялари қўллаб-қувватламаса, Санчес парламентда кўпчилик ўринни қўлга кирита олмайди

Бироқ, у буни ушбу минтақа ҳукумати раҳбари Пере Арагонес бошчилигидаги «Каталония сўл республикачилари» партияси ва Каталония минтақавий маъмурияти собиқ раҳбари, Белгияда бир неча йил давомида яшириниб юрган Карлес Пучдемоннинг «Биргаликда» коалицияси кўмагисиз амалга ошира олмайди. Иккаласи ҳам Каталония учун мустақилликка эришмоқчи ва 2017 йилда Каталония суверенитетини эълон қилишга уринган сепаратист сиёсатчиларга амнистия берилишини талаб қилмоқда. Испания ҳукумати уларнинг бир қисмини 2021 йилда афв этган.

Санчес яқин кунларда каталон партиялари билан музокаралар олиб бориш ниятида. Агар у 27 ноябргача ҳукмрон коалицияни туза олмаса, Испанияда янги парламент сайловлари 14 январга белгиланади.

«Амнистия ярашувга қаратилган эмас. Санчеснинг Испания социалистик ишчилар партияси фақат ҳокимиятда қолишни истайди», - дейди мухолифатдаги консервативлар етакчиси Фейхоо. Абаскал Санчеснинг режаларини конституцияга зид бўлган «исён» деб атади.

Ўз навбатида, Каталония маъмурияти раҳбари Арагонес баёнот бериб, унда Барселонадаги амнистияга қарши намойишни «ўнг ва ўта ўнг кучларнинг Каталониядан ўч олиш режаси муваффақиятсизликка учраганининг тасдиғи» деб атади.