“Дорининг пулига невараларимизга китоб олиб берамиз” – 15 йилдан бери Миллий боғда бадантарбия қилиб келаётган 50-90 ёшли аёллар

Ҳар куни эрталаб Миллий боғ яшил нимчали аёллар билан тўлади. Тошкентнинг турли туманларидан 50 дан 90 ёшгача бўлган аёллар бу ерга бадантарбия қилиш учун келади. Улар орасида педагогика фанлари доктори, Алифбе китоби муаллифларидан бири Қумри Абдуллаева ҳам бор. Kun.uz “спортчи” аёлларга микрофон тутди. 

Тошкент шаҳрида жойлашган Миллий боғга 2011 йилдан бери ёши 50 дан ошган аёллар бадантарбия учун чиқади. Гуруҳ "Эъзозли аёллар" деб аталиб, Хотин-қизлар қўмитаси ташаббусига кўра Шайхонтоҳур туманидаги Янгиобод маҳалласи аёллари билан ташкил қилинган. Гуруҳ аъзолари бир неча йиллардан бери гимнастрада мусобақаларида қатнашиб, юқори ўринларни эгаллаб келади. Бу машғулотлар уларга қандай фойда берганини аёлларнинг ўзлари гапириб берди.

Бу ерда 90 ёшгача бўлган аёллар ҳам бор. Масалан, Қумри Абдуллаева, 90 ёшда. У Алифбе китоби муаллифларидан бири ва педагогика фанлари доктори, профессор. Қумри ая 90 ёшда ҳар эрталаб вақтли уйғониб, бадантарбия қилиш учун куч топиб, Миллий боғга келади.

"Қишин-ёзин, хоҳ қор, хоҳ ёмғир бўлсин, бизга фарқи йўқ 15 йилдан бери ҳар куни келамиз. Машқ қилсам, ўзимни енгил ҳис қиламан, ортиқча юк бўлмайди, кайфият яхши бўлади. Ҳар куни бу ердаги аёллар билан кўришамиз, дийдорлашамиз", – дейди у.

Кекса онахонлардан яна бири – 82 ёшли Озода Шукурова. У ёшлигида мусиқа асбоблари ишлаб чиқариладиган фабрикада дутор косасини ясаган. 3 нафар фарзанди бор. Бир ўғли Америкада яшайди.

"Яқинда Америкага бориб келдим, саёҳат қилиб. 40 кун туриб келдим. Кўкаламзор, ўрмонзор жой, ҳавоси жуда яхши экан. Лекин Ўзбекистонни соғиндим, у ерда дугоналарим билан ҳар куни эрталаб машқ қилишга чиқардим, дедим болаларимга", – дейди Озода Шукурова.

76 ёшли Равшаной Йўлдошева "Эъзозли аёллар" гимнастрада гуруҳи асосчиларидан бўлиб, 5 нафар фарзанди, 14 невара, эвараси бор. У шу гуруҳнинг илк ташкилотчиларидан.

"Маҳалладагиларга айтиб, Муяссар Фатҳуллаева билан шу гуруҳни ташкил қилишда қатнашганмиз. Кейин ҳамма туманларга бориб, тарғибот қилганмиз. 2010 йилда гимнастрадада қатнашиб, “Дилхирож” куйига ўйнаганмиз. Шундан бери 14 киши ҳар йили гимнастрада мусобақаларида қатнашиб келамиз", – дейди у.

Гуруҳ қандай ташкил қилингани ҳақида 74 ёшли Ҳанифа Файзиева ҳам қўшимча қилди. Унинг айтишича, машғулотларни 4 нафар аёл билан бошлашган. Кейин секин-секин кўпайиб, ҳозир 60-70 нафарга етган.

“Ўзимга келсак, бир кун зинадан чиқолмаганим менга қаттиқ таъсир қилган. Шундан кейин ҳали ёшман-ку, ҳаракат қилай, деб бадантарбия машғулотларида қатнашишни бошладим. Ҳозир шу Алишер Навоий ҳайкалидаги зиналардан 2 марта тушиб чиқа оламан. Ёшимга нисбатан соғлиғим яхши. Доктор, дорихона демайман. Унинг ўрнига невараларимга китоблар олиб бераман, кутубхона, қўғирчоқ театри, паркларга олиб бораман", – дейди Файзиева. 

Кўринишдан 50-60 ёшлардаги аёлга ўхшайдиган 71 ёшли Элмира Мелиқулова эса узоқ йиллар давомида Фанлар академияси кибернетика институтида дастурчи бўлиб ишлаган. Кейинчалик "Ўзбекистон миллий энциклопедияси"да муҳаррир бўлиб ишлаган. У ҳам эрталабки машғулотлар қатнашчиси.

Яна бир қаҳрамонимиз 69 ёшли Қумри Ҳасанова 25 йил электрфотографлик билан шуғулланган, ҳозир нафақада. "Эрталаб аёлларни кўриб, кайфиятимиз кўтарилади ва бу кун бўйи бизга ҳамроҳ бўлади", – дейди у.

72 ёшли Арофат Турсунова эса "Эъзозли аёллар" гуруҳи тренери. Бир неча йиллар давомида мактабларга директорлик қилган. Бадантарбия машғулотлари ҳақида қўлланма чиқарган.

"Ўзим узоқ йиллардан бери мактабларда директор ўринбосари, директорлик қилганман ва мактабларда ҳам бадантарбия машғулотларини қилардик. Ўшаларнинг ҳаммасини жамлаб, китоб чиқардик", – дейди у.

Арофат опа боғда тоза ҳаво аёлларга жуда яхши таъсир қилиши, касали борлар ҳам хасталикдан фориғ бўлиши ҳақида айтади.

"3 фарзандим бўлса, энг каттаси 51 ёшда. Катта ўғлим, шу ёшда онам бадантарбияга чиқяпти, мен нимага бормас эканман, деб, спорт билан шуғулланишни бошлаган. Яъни айтмоқчиманки, одам ўзининг ҳаракатлари билан болаларига ҳам намуна бўла олади", – дейди Турсунова.

Гуруҳга исталган аёл келиб қўшилиши, бадантарбия машғулотларида иштирок этиши мумкин. Бунинг учун нима қилиш кераклигини гуруҳ тренери Арофат Турсунова тушунтириб берди.

"Гуруҳга танишларидан, қўшниларидан эшитиб ҳам аёллар келиб қўшилаверади. Биринчи марта келаётган аёл 6 яримда шу ерга келса, уни рўйхатга оламиз, гуруҳ аъзолари билан таништирамиз ва шундай қилиб машғулотларга қатнашиб кетаверади", – дейди у.

Зуҳра Абдуҳалимова, журналист
Оператор ва монтаж устаси – Шоҳруз Абдураимов