Хоразмда ўқувчини калтаклаган педагог ишдан кетди. Болалар омбудсмани ҳолатни назоратга олди

Kun.uz Хоразм вилояти Боғот тумани 2-ИДУМ ўқитувчиси ўқувчини калтаклагани акс этган видео ҳақида хабар берганди. Мактабгача ва мактаб таълими вазирлиги вазият ўрганилаётганини, батафсил маълумот берилишини билдирганди.

Хоразм вилояти Мактабгача ва мактаб таълими бошқармаси ҳолат ўз тасдиғини топганини хабар қилди.

Маълум қилинишича, видеолавҳада келтирилган ҳолат ҳақиқатан 30 октябр куни содир бўлган. Тарих фани ўқитувчиси 9-синф ўқувчисини қайта-қайта огоҳлантиришига қарамасдан дарс машғулотига тайёргарликсиз келгани учун калтаклаган. Ҳолат яна бир ўқувчи томонидан тасвирга олиниб, ижтимоий тармоққа жойланган.

Қўшимча қилинишича, ҳозирда мактаб ходими билан тузилган меҳнат шартномаси унинг хоҳишига кўра бекор қилинган. Боғот тумани ички ишлар бўлими терговга қадар суриштирув ўтказмоқда.

Ҳолатни Болалар омбудсмани ҳам ўрганаётганини маълум қилди.

“Ўқитувчи болага нисбатан бундай номаъқул муомалада бўлиши, уни уриши, таҳқирлашига ҳеч бир ҳолатда мутлақо йўл қўйиб бўлмайди. Бу борада боланинг манфаатларини ҳимоя қилиш юзасидан зарур бўлган барча чоралар кўрилади”, – дейилади бола ҳуқуқлари бўйича вакилнинг расмий баёнотида.