Россиялик журналист Борис Мақсудов Украинада ҳалок бўлди

«Россия 24» телеканалининг ҳарбий мухбири Борис Мақсудов Запорижжянинг босиб олинган қисмидаги Мирний қишлоғи яқинида яраланиб вафот этди, деб хабар бермоқда рус тилидаги ОАВ ва Telegram-каналлар 23 ноябр, пайшанба куни.

Қайд этилишича, Мақсудов 22 ноябр куни 503-мотоўқчилар полкида репортаж олиб бораётган вақтда дрондан портловчи мослама тушиши оқибатида жароҳатланган. Baza Telegram-канали хабарига кўра, мухбир кўплаб жароҳатлар олган ва оёқ-қўллари синган, бармоқлари узилиб кетган. У ҳужумдан кейинги кун вафот этди.

22 ноябр куни Россия Мудофаа вазирлиги Борис Мақсудовнинг яралангани ҳақида хабар бериб, у «зудлик билан тиббий муассасага эвакуация қилингани» ва «ҳаётига ҳеч қандай хавф йўқлигини» билдирган. Россия вазирлиги воқеа учун айбни украиналик ҳарбийларга юклади, унга кўра, улар «Украина Қуролли кучларининг Запорижжя вилояти ҳудудларида аҳоли пунктларини ўққа тутиши ҳақида материал тайёрлаётган бир гуруҳ россиялик журналистларга учувчисиз учиш аппарати билан зарба берди».

Украина томони воқеа юзасидан изоҳ бермади.