Песков: Путин ҳали сайловда номзод сифатида рўйхатдан ўтмади

Кремл вакили сўзларига кўра, Владимир Путиннинг Россия президенти лавозимига номзоди кўрсатилиши билан боғлиқ айрим жиҳатлар ҳали аниқлаштирилмаган.

Фото: Сергей Гунеев / РИА Новости

Владимир Путиннинг янги президентлик муддатига қайта сайланиш учун сайлов кампанияси аслида бошланди, бироқ ҳали барча керакли расмиятчиликларни бажариш керак. Бу ҳақда давлат раҳбари матбуот котиби Дмитрий Песков 8 декабрда шу кунни Путин сайловолди кампаниясининг бошланиши деб аташ мумкинми, деган саволга жавобан айтиб ўтди.

«Агар де-факто гапирилса, унда, эҳтимол, ҳа. Агар де-юре гапирилса, унда йўқ. У ҳали номзод сифатида рўйхатга олинмаган. У қандай иштирок этишини сизга маълум қиламиз, у ҳали номзод сифатида рўйхатдан ўтиши керак, барча керакли расмиятчиликлар бажарилиши лозим ва шундан кейингина у сайловолди ташвиқоти давомида президентликка номзод бўлади», — деди Песков журналистларга.

Кремл вакили қўшимча қилишича, Путиннинг Россия президентлигига номзоди билан боғлиқ айрим жиҳатлар ҳали аниқлаштирилмаган. «Тегишли қарорлар қабул қилинганда, биз сизни хабардор қиламиз», деди у. Песковнинг сўзларига кўра, Путин 17 декабрга белгиланган «Ягона Россия» қурултойида иштирок этиши кутилмоқда.

Путин 5-муддатга президентликка номзодини кўрсатишини эълон қилди

Кеча Путин янги, бешинчи президентлик муддатига номзодини қўйишини маълум қилганди. Бир кун олдин Федерация кенгаши навбатдаги президентлик сайловларини 2024 йил 17 мартга тайинлади ва 8 декабрда Россия Марказий сайлов комиссияси 2024 йилда Россияда президентлик сайловларини уч кун ичида – 15-17 март кунлари ўтказиш тўғрисида қарор қабул қилди. Россия назоратидаги Украина ҳудудларида овоз беришни ўтказиш қарори хавфсизлик кучлари билан маслаҳатлашувлардан сўнг 12 декабргача қабул қилинади.

Кимлар рақиб бўлиши мумкин?

Россия мухолифати етакчиларидан бири Алексей Навалний тарафдорларини март ойида сайлов участкаларига бориб, овоз беришга чақирди. Навалнийга кўра, овоз бериш орқали қарши ташвиқот олиб бориш мумкин.

Путиндан ташқари, Коммунистик партия раҳбари Геннадий Зюганов, Давлат думаси собиқ депутати Борис Надеждин, Донецкдаги россияпараст айирмачиларнинг собиқ ҳарбий раҳбари Игор Стрелков (Гиркин) ва ржевлик журналист Екатерина Дунцова ҳам сайловларда иштирок этиш ниятини маълум қилган. «Новые люди» партияси ҳам ўз номзодини кўрсатишни режалаштирган.

Шу билан бирга, кузатувчилар 71 ёшли Путиннинг жиддий сиёсий рақиблари йўқлигини таъкидламоқда.