Аргентина президенти кенг кўламли иқтисодий ислоҳотларни ваъда қилди

Аргентинанинг янги президенти Ҳавер Милей 20 декабр, чоршанба куни иқтисодиётни тартибга солишни бекор қилишга қаратилган чора-тадбирлар тўпламини эълон қилди. Бу чора-тадбирлар 300 та амалдаги нормаларни бекор қилиш ёки ўзгартиришни назарда тутади, деди давлат раҳбари ўз телемурожаатида. У жорий тартиб-қоидалар иқтисодий ўсишга тўсқинлик қилаётганига ишора қилиб, ислоҳотларнинг долзарблигини таъкидлади.

Хусусан, меҳнат ва кўчмас мулк бозорини тартибга солувчи бир қатор қонунлар бекор қилиниши кутилмоқда. Меҳнат қонунчилиги ислоҳоти «ҳақиқий иш ўринларини» яратишга кўмаклашиш учун мўлжалланган, деб тушунтирди Милей. Бундан ташқари, барча давлат компаниялари уларни янада хусусийлаштириш мақсадида акциядорлик жамиятларига айлантирилади. 

Шу куни минглаб одамлар Буэнос-Айресда янги ҳукуматнинг либерал иқтисодий сиёсатига қарши намойишга чиқди. Намойиш асосан тинч ўтди. Аввалроқ расмийлар намойишчилар кўчаларни тўсиб қўйса, кескин жавоб бериш билан таҳдид қилган эди. 

Аргентина иқтисодиётининг муаммолари 

ЯИМ бўйича Жанубий Американинг иккинчи йирик давлати оғир иқтисодий инқирозда. Инфляция даражаси 160 фоиздан ошади, аҳолининг қарийб 40 фоизи қашшоқлик чегарасида яшайди. Муаммоларни енгиб ўтишга, жумладан, ҳаддан ташқари «шишиб» кетган давлат аппарати, меҳнат унумдорлигининг пастлиги ва яширин иқтисодиётнинг юқори даражаси тўсқинлик қилмоқда. 

Милей BRICS’да иштирок этиш ва ҳукуматнинг фуқаролар ҳаётига аралашувига қарши 

Либертарлар партияси раҳбари Ҳавер Милей декабр ойи бошида Аргентина президенти лавозимини эгаллади. У мамлакатнинг BRICS гуруҳига қўшилиши ғоясини қўллаб-қувватламайди, давлатнинг фуқаролар ҳаётига минимал аралашувини ёқлайди, Марказий банкни тугатмоқчи ва миллий валюта – песони АҚШ долларига алмаштиришни таклиф қиляпти. Иқтисодий муаммоларни ҳал қилиш учун Милей бюджет харажатларини жиддий равишда қисқартириш ниятида.