Янги йил кунларида мухлисларининг дилини хира қилган «Арсенал» ниҳоят 17 декабрдан буён биринчи ғалабасига эришиб, барча турнирлар доирасидаги уч мағлубиятдан иборат сериясига барҳам берди. Инқироз ҳолатига тушиб қолган «Кристал Пэлас»га қарши ўйин тўлиқ «канонирлар» назоратида ўтди. Ўйинни амалда стандарт вазиятлар ҳал қилди, биринчи бўлимда бразилиялик ҳимоячи Габриэл Магалянс жамоанинг асосий қуролига айланди ва Микел Артета «Эмирейтс»даги 50-ғалабани нишонлашини таъминлади.
11-дақиқада Габриэл бурчакдан тўп узатилганида дарвозабон ҳудудида баланд сакради ва бош билан дарвозани ишғол этди. Иккинчи бор дарвоза ишғол этилганида гол «Кристал Пэлас» дарвозабони Дин Ҳендерсон номига ёзилди, тўп унга тегиб дарвозага кирганди, аммо бу вазиятда ҳам барчасини мураккаб вазиятда турганига қарамасдан бош билан зарба беришни уддалаган ҳимоячи ҳал қилганди.
Бу мавсумда «Арсенал» стандарт вазиятлардан урилган голлар сони бўйича АПЛда энг яхши натижани қайд этмоқда (13).
Меҳмонлар эса рақиб мудофаасидан ўта олмади ва асосан узоқ масофадан зарбалар йўллаш билан ўз омадини синаб кўрди - зарбалар бўйича нисбатан юқори кўрсаткич қайд этилгани ҳам шу туфайли бўлди (21-12, аниқ зарбалар бўйича 6-5), аммо амалда бундай зарбалар Райя учун осон ўлжа эди.
Иккинчи бўлим бошида эса бошқа бир Габриэл - ҳужумчи Жезус қарши ҳужумда Троссарни қулай вазиятга чиқариб юборди ва ҳисоб йирик кўриниш олди. Белгиялик футболчи ўрнига туширилган учинчи Габриэл - Мартинелли эса ўйинга қўшиб берилган дақиқаларда эгизак голлар билан ҳисобни 5:0 кўринишга келтирди. Бу мавсумда иккинчи бор шу ҳисобда ғалаба қозонган «Арсенал» турнир жадвалида учинчи ўринга кўтарилди, «Кристал Пэлас» 15-ўриндан 14-ўринга тушди, Рой Ҳожсон АПЛ жамоалари бош мураббийлари орасида истеъфога чиқиш учун асосий номзодга айланди.
Мавзуга оид
Италия: Менян ирқчилик туфайли майдонни тарк этди. Уни қайтишга кўндиришди, аммо у оддий вазиятларда иккита гол ўтказиб юборди – «Милан» барибир камбэк билан ғалаба қозонди
А Серияда навбатдаги можаро рўй берди. Бу сафар «Удинезе» ва «Милан» иштирокидаги ўйинни тўхтатиб туришга ҳам тўғри келди.
Биринчи бўлим охирида меҳмонлар дарвозабони Майк Менян арбитр Фабио Марескега «Удинезе» мухлисларининг ҳаракатларидан шикоят қилди. Улар француз дарвозабонга қарата ирқчилик сўзлари айтишгани маълум бўлди. Менян бу ҳақда ҳакамни хабардор қилгач, жамоадошлари томонидан қўллаб-қувватланди.
Кейин эса дарвозабон майдонни тарк этди ва кийим алмаштириш хонасига йўл олди. Менян ўйинни қайтишни режалаштирмаётганди, аммо жамоадошлари ва мураббийнинг ундови билан барибир майдонга қайтиб чиқди. Футболчилар трибуна остидаги жойда уни ўраб олиб, ундан қайтишни сўраётгани акс этган кадрлар пайдо бўлди. Бунга параллел равишда «Удинезе»нинг бир қанча футболчилари эса фанатлар олдига келиб, улардан тинчланишни сўрашди.
Маълум вақтдан кейин «Милан» тўлиқ таркибда майдонга қайтди — жамоадошлари бир амаллаб Менянни кўндиришганди. Бу вақтда меҳмонлар Рубен Лофтус-Чикнинг голи эвазига ҳисобда олдинда бораётганди. Ўйин қайта бошланганидан бир неча дақиқа ўтиб «Удинезе» жавоб голини урди — Лазар Самаржичнинг 25 метрлардан берган зарбаси Менянни доғда қолдирди, у ҳатто жойидан қимирлай олмади.
Иккинчи бўлим ўрталарида, иккинчи гол урилган эпизодда ҳам Майк жуда ишончсиз ўйнади: Флориан Товен тўпни унинг яқин бурчагидан дарвоза тўрига киритди – бундай вазиятларда дарвозабонлар қутқариши керак.
«Милан» 83-дақиқага қадар турнир жадвалининг 16-ўрнида бораётган жамоадан ҳисобда ортда борди. Кейин Стефано Пиолининг ўйинчи алмаштиришлари иш берди: Никола Йович ҳисобни тенглаштирди (у 75-дақиқада майдонга тушди), Ноа Окафор ғалаба голини урди (у 68-дақиқада майдонда пайдо бўлганди).
Шундай қилиб миланликлар ўйинда бурилиш ясади ва ғалабани илиб кетди: бу сўнгги олти ўйиндаги бешинчи ғалаба. Бу билан жамоа нафақат чемпионлик пойгасида қолди – «Интер» олти очко олдинда, балки барчасига Майк Менян айбдор қилинишига йўл қўймади. Қолаверса, бу жамоа бош мураббийи Пиоли учун юбилей ғалаба бўлди - 166 ўйинда 100 ғалаба. Бу орқали ушбу мутахассис Нерео Рокко, Фабио Капелло, Нилс Линдҳолм ва Карло Анчелотти каби россонерилар тарихидаги энг муваффақиятли мураббийлар қаторидан жой олди.
«Рома»нинг Жозе Моуринио ишдан бўшатилганидан кейинги илк ўйини икки жамоанинг навбатма-навбат ҳужумлари билан кечди. Бўлим ўрталарига бориб Ал-Шаъровий Лукакуни дарвозабон билан яккама-якка вазиятга чиқариб юборди. Италиялик ушбу футболчи кўп ўтмай яна бир голли узатмага муаллифлик қилди — бу мавсумни аввалгилари каби кучли ўтказа олмаётган Пеллегрини яна гол ура бошлаши римлик мухлислар учун яна бир ёқимли воқеа бўлди. Пеллегрини ва Ал-Шаъровий — жамоани мавсум охирига қадар қабул қилиб олган Даниэле Де Росси учун алоҳида иштиёқ билан курашадиган шахслар ҳисобланади, улар ўз вақтида жамоадош бўлишган.
Турнир жадвалининг қуйи қисмидаги «Верона» устидан ғалаба — ҳали кўп нарсани англатмайди, қолаверса бу жамоа иккинчи бўлимда пеналтидан гол ура олмади, аммо амалда «Рома» йил бошидан буён илк ғалабасини қайд этди.
Германия: «Боруссия» кучли тўртликка қайтиш арафасида, «Байер»да яна ғалаба
«Байер» футболчилари иккинчи бор ҳисобни тенглаштираётган вазият
Фото: MAJA HITIJ/GETTY IMAGES
Санчонинг Дортмундга қайтиши том маънода ғалаба пазли учун етишмай турган сўнгги детал бўлиб чиқди. У қайтганидан кейин «Боруссия» сафарда қаторасига иккинчи бор йирик ҳисобда ғалаба қозонди, бу сафар Жейдон голли балл ишламаган бўлса-да, у майдонда жамоа учун муҳим ролни бажармоқда. Биринчи бўлимдаги устунлик иккинчи бўлим бошида мезбонларнинг кетма-кет ҳужумлари остида йўққа чиқиши мумкин эди, аммо Кобел ва дарвоза устуни меҳмонларни қутқарди, кейин Санчо ташаббусни қўлга олди ва пеналти ишлади. Фюллкруг зарбани аниқ ижро этганида, «Кёлн» таслим бўлди ва дарҳол Малендан яна бир гол ўтказиб юборди. «Боруссия» кучли тўртликдаги рақибларни таъқиб этишда давом этмоқда.
Бу рақиблардан бири Боҳумда муваффақиятсизликка учради, бунда «Штутгарт» меҳмонларининг ҳам айби йўқ эмас. Улар ўз баннерлари билан захира чиқиш йўлини тўсиб қўйиб, ўт ўчирувчилар ва хавфсизлик хизмати ходимларининг талабларини бажаришдан бош тортишди. Баҳс шунчалик узоқ давом этдики, иккинчи бўлим 40 дақиқа кечикиб бошланди.
Танаффусдан кейин эса «Боҳум» ғалаба голини урди, Африка кубогига кетган асосий ҳужумчиси Гирасси йўқлигида «шваблар» ҳеч нарса қила олмади. Янги йил таътиллари арафасида «Боруссия»дан етти очко олдинда бўлган жамоа энди атиги бир очколик фарқ билан олдинда бормоқда.
Турнинг марказий учрашуви «Лейпциг» ва «Байер»дан бошқа клубларнинг мухлисларининг ҳам диққат марказида турди. Мюнхен ва Дортмунддагилар мос равишда чемпионлик ва кучли тўртлик учун рақобатчиларининг очко йўқотишини кутаётганди ва 90-дақиқагача таблода рақобатчилар учун қулай бўлган 2:2 ҳисоби порлаб турди. Фақат чемпионлик характери — бу қандайдир алоҳида нарса бўлиб, леверкузенликлар бир гуруҳ футболчиларидан фойдалана олмаганига қарамай, яна бир бор вазиятдан максимум натижа чиқариб олишди.
Хаби Алонсо жамоаси биринчи бўлимда ютқазди ва етакчилардан бири Фримпонг сафдан чиқди. Аммо захирадан туширилган Телла «аспиринчилар»га хос ҳужумда ҳисобни тенглаштирди, ҳолбуки ушбу футболчи бунгача 18 турда жами 129 дақиқа майдонда бўлганди. Ушбу қанот ҳимоячисига жамоанинг бошқа бир латерали Грималдо голли узатма берди. Кейин эса «Байер» бурчак зарбаси вақтида тўлиқ таркиб билан олдинга борганида қарши ҳужумда Опендадан гол ўтказиб юборди. Меҳмонлар бунга ҳам тезда реакция қилишди, ҳимоячи Та ҳисобни тенглаштирди. Ўйинга қўшиб берилган дақиқаларда эса бошқа бир марказий ҳимоячи Инкапе Грималдонинг бурчакдан узатиб тўпини дарвоза тўрига йўллаб, ғалаба голини урди. Қаторасига иккинчи ўйинда қўшимча дақиқаларда ғалаба илиб кетилди — жамоа чемпионлик учун яна бир қадам ташлади. «Бавария» якшанба куни «Вердер»ни ва чоршанба куни қолдирилган ўйинда «Унион»ни мағлуб этса ҳам «Байер»га етиб ололмайди.
Кун статистикаси
«Арсенал»нинг захирадан тушган футболчилари 16 та голли балл ишлаган, жамоа бу борада АПЛда етакчи.
«Вилярреал» ҳисобда олдинга борган ўйинларида 16 очко йўқотган. Бу Испания чемпионатида энг ёмон кўрсаткич, «сариқ субмариналар» ўтказиб юборилган голлар сони (42) бўйича фақат сўнгги ўриндаги «Алмерия»дан олдинда.
«Вилярреал» ҳужумчиси Серлот ла лигада 85-ўйинини ўтказди (2021-2023 йилларда «Реал Сосиедад»да ҳам ўйнаган). Бу норвегиялик футболчилар учун рекорд, бунгача энг яхши натижа Жон Карюда эди (2000-2004 йилларда «Валенсия» аъзоси бўлган).
