2024 йил 19 январ куни МДҲ мамлакатлари орасида етакчи IТ-дистрибьюторлардан бири бўлган Techpro DC, HP Inc. ва Intel компанияси 2024 йилги “Blitz Day Tashkent 2024” биринчи йирик минтақавий IТ конференциясини ўтказди.
Тошкентдаги InterContinental меҳмонхонасида бўлиб ўтган тадбирга HP Inc. компаниясининг сўнгги маҳсулот ва технологиялари, Intel процессорлари асосидаги босма ва мижоз қурилмалари билан танишиш ҳамда 2023 йил натижаларини сарҳисоб қилиш мақсадида Марказий Осиё давлатларидаги Techpro DC компанияси ҳамкорларидан 100дан ортиқ иштирокчилар ташриф буюришди. Конференция иштирокчилари учун HP Inc. мижоз қурилмаларининг сўнгги маҳсулотлари ва катта қизиқишларга сабаб бўлган Intel процессорлари акс эттирилган демо-стенд тайёрланди.
“Techpro DC” компанияси асосчиси ва бош менежери Нигор Ҳасанова тадбир иштирокчиларини табриклаб, Ўзбекистоннинг жадал суръатларда ривожланаётгани, бу эса ўз навбатида IT соҳасига ижобий таъсир кўрсатаётганини таъкидлади.
“Бугунги кунда компаниямиз фаолият юритаётган мамлакатларда савдони ошириш учун етарли салоҳият мавжуд. Минтақада амалга оширилаётган рақамлаштириш жараёнлари замонавий ечимлар ва илғор технологияларни жорий қилишни тақозо қилади. Ҳамкорларимиз учун бугунги тадбирни ташкил қилиш орқали биз нафақат ўз ўсиш суръатларингизни оширишда ёрдам беришга, балки мижозларингизнинг IT инфратузилмасини тубдан янги босқичга олиб чиқиш имкониятини тақдим этишга интиламиз”, — деди у ўз нутқида.
Сўнгра ўтган йил якунлари сарҳисоб қилиниб, жорий йилга мўлжалланган улкан режалар қайд этилди, конференция ушбу муҳокамалар учун қулай платформа ҳисобланади.
Шундан кейин HP компаниясининг Марказий Осиёдаги ҳамкор бизнесни ривожлантириш ва кенгайтириш бўлими раҳбари Алексей Анисимов сўзга чиқиб HP Inc. жамоасини таништирди. Алексей Анисимов ҳамкорларнинг Марказий Осиё минтақаси мамлакатларида НР İnc ва Techpro DC бизнесини ривожлантиришга қўшган салмоқли ҳиссасини таъкидлаб, НР İnc компанияси билан ҳамкорликни ривожлантириш муҳимлигини қайд этиб HP Amplify ҳамкорлик дастури ҳақида гапирди. НР İnc компаниясининг Ўзбекистоннинг турли ҳудудларида фаолият юритаётган кичик ва ўрта бизнес ҳамкорлари ўртасида ўз маҳсулотлари бўйича бизнесни ривожлантиришга қизиқиши ҳам қайд этилди.
