ОАВ маълумотларига кўра, Белгород вилоятида ҳалокатга учраган Ил-76 самолётида қурол бўлган бўлиши мумкин. Бундан ташқари, журналистлар Маргарита Симонян эълон қилган ҳамда самолётда бўлгани айтилаётган украиналик асирлар рўйхатида номувофиқликларни аниқлади.
Белгород вилоятида ҳалокатга учраган Россиянинг Ил-76 ҳарбий-транспорт самолёти Украина чегараси томон эмас, балки у томондан учаётган бўлган. Бу ҳақда 24 январ, чоршанба куни «Медиазона» ва «Важные истории» нашрлари, шунингдек, Украинанинг «Скринька Пандори» («Пандора қутиси») OSINT-таҳлилчиси хабар берди. Журналистлар самолёт ҳалокати акс этган кадрларни таҳлил қилиб, видео Яблоново қишлоғи марказидан шимолга қараб олинган, деган хулосага келди.
«Скринька Пандори»га кўра, Ил-76 борт рақами RA-78830 бўлган ҳамда ҳалокатдан олдин Миср, Саудия Арабистони, Қизил денгиз ва Эрон орқали парвоз қилган. Сурия яқинида у радарлардан ғойиб бўлди, шундан сўнг Белгородда яна пайдо бўлди, деб ёзади Telegram-канал. «Ҳаммаси унинг шарқдан қурол олиб келганидан далолат беради. Ҳозирча унда асирлар бўлган бўлиши мумкинлигидан дарак йўқ», - дейди украиналик таҳлилчи.
Ўз навбатида, «Верстка» нашри Flightradar маълумотларига таяниб, RA-78830 рақамли Ил-76 охирги марта Кипр яқинида Москва вақти билан соат 10:10 да сигнал юборганини, ҳалокат эса Москва вақти билан соат 11:15 да содир бўлганини аниқлади. «Самолёт Кипрдан Белгород вилоятигача бўлган масофани бир соатдан кўпроқ вақт ичида босиб ўтишга улгурмаган бўларди. Бундан ташқари, афтидан, RA-78830 Сурияга қўнишга тайёрланаётган эди - сигнал узатишнинг сўнгги 15 дақиқасида у баландлигини 32 минг футдан 20,3 минггача туширди», - дейди «Верстка».
Бош штаб: Украинани ҳимоя қилиш учун барча чоралар кўрилмоқда
Айни вақтда, Украина қуролли кучлари бош штаби Ил-76 ҳалокатидан кейинги баёнотни эълон қилди. «Украина армияси террор таҳдидини, шу жумладан Белгород-Харкив йўналишида ҳаво ҳудудини назорат қилиш учун етказиб берилаётган воситаларни йўқ қилишни давом эттиради», дейилади Украина бош штабининг Facebook саҳифасида.
Баёнотда, шунингдек, Украина қуролли кучлари мамлакатни ҳимоя қилиш учун барча чораларни кўраётгани, РФ эса жанг майдонида ҳеч қандай натижага эриша олмаган бир пайтда ўз стратегиясини давом эттираётгани таъкидланади. Сўнгги бир ҳафта ичида Россия қуролли кучлари Харкив вилоятига 19 та ракета ҳужумини амалга оширди, шу билан бирга, «ҳужумларнинг интенсивлиги яқинда Белгород аэродромига юборилган ҳарбий-транспорт самолётлари сонининг кўпайиши билан бевосита боғлиқ», деб таъкидланади маълумотда. Шу билан бирга, Украина қуролли кучлари бош штабининг баёнотида Ил-76 самолётининг қулаши ҳақида ҳеч нарса айтилмаган.
Симонян рўйхати ва Россия музокаралар гуруҳи ҳақидаги маълумотлар
Аввалроқ Россиянинг Russia Today ресурси бош муҳаррири Маргарита Симонян ўзининг Telegram-каналида ҳалокатга учраган самолётда учган украиналик ҳарбий асирлар бўлган 65 кишининг исми ва туғилган саналари рўйхатини эълон қилган эди. Ушбу ахборотдан сўнг, украиналик журналистлар Симонян рўйхатидагиларнинг бир қисми аввалроқ алмаштирилганини аниқлади. «Ушбу рўйхатдаги 17 кишининг исми 3 январ куни алмаштирилган асирлар рўйхатидаги исмларга тўғри келади», деб ёзади Украина ОАВ.
«Брифинг» Telegram-канали ўзининг аноним манбасига таяниб, Россия музокарачилар гуруҳи Ил-76 самолётида учганини хабар қилди. «Ўлганлар орасида Абрамовичнинг ёрдамчиси ва Рамзан Қодировнинг музокарачилари, шунингдек, мудофаа вазирлиги офицерлари ҳам бор эди. Бу фалокат. Ўтган йил давомида ҳарбий асирлар алмашинувини таъминлаган одамлар ҳалок бўлди», - дейди нашр суҳбатдоши.
Белгород вилоятида самолёт ҳалокатга учраши
Ил-76 ҳарбий-транспорт самолёти 24 январ куни Белгород вилоятининг Корочанск туманида Яблоново қишлоғи яқинидаги далага қулаб тушди. Вилоят губернатори Вячеслав Гладковнинг сўзларига кўра, бортдаги барча одамлар ҳалок бўлган. Telegram’даги «Важные истории» ва «ЧТД» каналлари Россия мудофаа вазирлигига таяниб, Ил-76 бортида алмашиш учун олиб кетилаётган 65 нафар украиналик асир, шунингдек, 6 нафар экипаж аъзоси ва 3 нафар ҳамроҳлик қилувчи шахс бўлганини маълум қилди.
Кейинроқ фавқулодда баёнотда Украина бош разведка бошқармаси ҳарбий асирларни алмашиш 24 январга режалаштирилганини тасдиқлади, бироқ украиналик асирларнинг хавфсизлигини Россия томони таъминлаши кераклигини таъкидлади. Ил-76 ҳалокати ҳақида изоҳ берар экан, бош разведка бошқармаси шундай таъкидлади: «Ҳозир Украинада самолёт бортида ким бўлгани ҳақида ишончли ва кенг қамровли маълумотлар йўқ. Ўз навбатида, Украина алмашиш жараёнини тўғри тайёрлаш бўйича барча келишувларни бажарди. Россиялик асирга олинган ҳарбий хизматчилар ўз вақтида алмашиш учун келишилган жойга етказилди, улар хавфсиз эди. Ҳимоячиларимизнинг хавфсизлиги, келишувларга кўра, Россия томонидан таъминланиши керак эди».
«Транспорт самолётининг 30 километрлик жанговар зонага қўниши хавфсиз бўлиши мумкин эмас ва ҳар қандай ҳолатда ҳам ҳар икки томон муҳокама қилиши керак. Биз Россия Федерациясида вазиятни беқарорлаштириш мақсадида режалаштирилган ҳамда Украина ва давлатимизга халқаро ёрдамни заифлаштириш учун қасддан қилинган ҳаракатлар ҳақида гапиришимиз мумкин», - дейилади ҳужжатда.
Россия мудофаа вазирлиги Киевни «теракт»да айблади
Россия мудофаа вазирлиги ҳалокатни «теракт» деб атади ва унда Киевни айблади. Идоранинг таъкидлашича, самолёт Украина қуролли кучлари томонидан Харкив вилояти Липци туманида зенит-ракета тизими ёрдамида уриб туширилган. Хабарда айтилишича, Россия аэрокосмик кучларининг радиолокацион ускуналари «иккита Украина ракетаси учирилганини» қайд этган. Давлат думаси спикери Вячеслав Володин Ил-76 ҳалокати юзасидан АҚШ конгресси ва Германия бундестагига мурожаат тайёрлашни топширди.
Украина Telegram-каналлари дастлаб самолёт ҳалокати «Украина қуролли кучларининг иши» эканини маълум қилган, бироқ тез орада бу маълумотни ўчириб ташлади. «Украинская правда» нашри Украина қуролли кучлари бош штабидаги манбаларига таяниб, самолёт С-300 зенит-ракета тизими учун ракеталарни олиб кетаётган бўлганини ёзди. «У Харкив вилояти аҳолисининг ўлимига олиб келувчи нарса - С-300 учун ракеталар олиб кетаётган бўлган», деди нашр суҳбатдошларидан бири. Расмийлар томонидан бу маълумот тасдиқланмади.
