Россия АҚШ ва Европадан бир йилда 1,7 млрд долларлик чиплар олди

Россия армиясининг Украинада уруш олиб бориш учун технология олишига йўл қўймаслик учун қўйилган чекловларга қарамай, Россия ўтган йили 1 миллиард долларлик замонавий Америка ва Европа чипларини импорт қилди. Бу ҳақда Bloomberg пайшанба куни Россия божхона маълумотларига таяниб хабар берди.

Агентлик маълум қилишича, ҳарбий техника, жумладан, танклар ва ракеталар ишлаб чиқаришда қўлланиши мумкин бўлган импорт чиплари Американинг Intel Corp, Advanced Micro Devices (AMD) ва Analog Devices Inc., шунингдек, Infineon Technologies AG, STMicroelectronics NV ва NXP Semiconductors NV Европа компаниялари томонидан ишлаб чиқарилган.

Россия томонидан сотиб олинган чип ишлаб чиқарувчилари орасида бир нечта Хитой компаниялари, шунингдек, Тайваннинг Realtek Semiconductor компанияси бор. Bloomberg таъкидлашича, бу компанияларнинг барчаси санкциялар қонунчилигини бузганлиги ва технологияни Россияга экспорт қилгани ҳақида ҳеч қандай далил йўқ. Агентликнинг эслатишича, санкцияланган технологияларнинг аксарияти учинчи давлатлар, жумладан Хитой, Туркия ва БАА орқали Россияга етиб боради.

Ғарб компаниялари санкцияларни бузганини рад этади

Маҳсулотлари Россияга кирган Америка ва Европа компаниялари санкциялар талабларига тўлиқ риоя қилганини ва 2022 йил февралида Россия қўшинларининг Украинага ҳужумидан кейин Россия Федерациясидаги фаолиятини тўхтатганини маълум қилди.

Июл ойида «Верстка» нашри божхона маълумотларига таяниб, биргина 2023 йилнинг биринчи олти ойида Американинг Intel ва AMD маҳсулотлари, жумладан, микропроцессорлари Россияга мос равишда 169 миллион доллар ва 35 миллион доллардан ортиқ миқдорда импорт қилингани ҳақида хабар берган эди. Умуман олганда, нашрнинг ҳисоб-китобларига кўра, олти ой давомида Россия Федерациясига ғарб компанияларининг қиймати 502 миллион доллардан ортиқ чиплари импорт қилинган.