Самарқандда электр ва газдан ноқонуний фойдаланган истеъмолчилар тизимга 5 млрд сўм зарар етказди

Самарқанд вилоятида айрим истеъмолчиларнинг энергия ресурсларидан ноқонуний фойдаланишлари натижасида тизимга 5 млрд сўмлик зарар етказилган. Бу ҳақда Энергетика вазирлиги хабар бермоқда.

Маълум қилинишича, 2024 йил 7-9 феврал кунлари «Ўзэнергоинспекция», Бош прокуратура, ИИВ ҳамда электр ва газ таъминоти корхоналари ходимлари ҳамкорликда Самарқанд вилоятида ўтказган назорат тадбирларида энергия ресурсларидан ноқонуний фойдаланилган 23 та ҳолат аниқланган.

Дастлабки ҳисоб-китобларга кўра, оқибатда тизимга 5 млрд сўмлик зарар келтирилган.

Хусусан, Пахтачи туманида «Х.Қ.С.» МЧЖга қарашли иссиқхона табиий газдан ноқонуний фойдаланиши натижасида 3,3 млрд сўмлик зарар етказилган.

Ургут туманида «С.Н.» МЧЖга қарашли ишлаб чиқариш цехининг трансформатори ўзбошимчалик билан алмаштирилган ва ушбу ҳолат бўйича 700 млн сўм миқдорида қайта-ҳисоб амалга оширилган.

Қайд этилишича, қоидабузар истеъмолчиларга нисбатан белгиланган тартибда чора кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинган.