“Бу боланинг конституцияда кафолатланган шахсий дахлсизлик ҳуқуқига таҳдид солади” – Болалар омбудсмани Навоийдаги ҳолатни ўрганмоқда

Навоий шаҳридаги 2-умумтаълим мактаби директори томонидан таълим масканига сартарош чақиртирилиб, ўқувчиларнинг сочи мажбурий олдирилиш ҳолати юзасидан Болалар омбудсмани ўрганиш бошлади.

“Мактаб маъмурияти томонидан бундай ҳаракатларга мутлақо йўл қўйиб бўлмайди. Биринчи навбатда, бу умумий ўрта таълим муассасаларининг одоб-ахлоқ қоидаларига зид. Муҳими эса, бу боланинг конституцияда кафолатланган шахсий дахлсизлик ҳуқуқи ҳамда унинг шаъни ва қадр-қиммати ҳурмат қилиниши ҳуқуқига таҳдид солади. Мазкур ҳаракатга йўл қўйган масъулларга нисбатан тегишли чора кўрилиши зарур”, дейилади Болалар омбудсмани хабарида.

Қўшимча қилинишича, ҳозирда бу каби номақбул ҳолатларнинг бошқа таълим муассасаларида ҳам юзага келмаслиги бўйича чоралар кўрилмоқда.

Олдинроқ Навоий шаҳридаги 2-умумтаълим мактабида ўғил бола ўқувчиларнинг оммавий равишда сочини олиш “тадбири” ўтказилгани, бу мактаб директори Нурқобил Юсуповнинг ташаббуси бўлгани хабар қилинганди. Навоий вилояти Мактабгача ва мактаб таълими бошқармаси бошлиғи Раъно Ҳайитова бу умуман оқлаб бўлмайдиган ҳолат эканлигини билдирган.