Гулистон тумани собиқ ҳокими 300 минг долларга ер сотиш билан боғлиқ ишга алоқадорлиги аниқланди

Сирдарё, Самарқанд, Қашқадарё ва Сурхондарё вилоятларида ер майдонларининг ноқонуний сотилиши билан боғлиқ ҳолатларга чек қўйилди.

Гулистон шаҳрида яшовчи, 1964 ва 1976 йилларда туғилган икки шахс ўзаро тил бириктириб, ҳозирда Гулистон тумани ҳокимияти захирасида бўлган 38 сотих ер майдонини тадбиркорлик билан шуғулланмоқчи бўлган фуқарога олиб бериш ҳамда ушбу ер майдонида кўп қаватли уй-жой қуриш учун мансабдор танишлари орқали тегишли ҳужжатларни расмийлаштириб бериш эвазига 300 минг АҚШ доллари талаб қилишган.

Давлат хавфсизлик хизматининг Сирдарё вилояти бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда Гулистон шаҳрида ўтказилган тезкор тадбирда улар олдиндан 50 минг АҚШ доллари олган вақтида ушланди.

Терговга қадар текширув давомида ушбу ноқонуний ишга 2018-2021 йилларда Гулистон тумани ҳокими лавозимида ишлаган шахс ҳам алоқадор экани аниқланган.

• Маълумот учун, 2018 йил 18 октябрдан 2021 йил 12 августига қадар Шавкат Ғофуров Гулистон туман ҳокими лавозимида ишлаган, унинг ўрнига тайинланган Сайдимқул Бегимқулов эса 2023 йил июлида ишдан олинганди.

Шунингдек, Самарқанд вилояти Нуробод туманидаги қишлоқ хўжалиги маҳсулотлари етиштиришга ихтисослаштирилган фермер хўжалиги раҳбари ва ҳисобчиси ўзаро тил бириктириб, мазкур хўжаликка 49 йил муддатга ижарага берилган 3 гектар ер майдонини харидорга 70 минг долларга сотишга келишиб, олдиндан 35 минг доллар олган вақтида ушланган.

ДХХнинг Қашқадарё вилояти бўйича бошқармаси ходимлари ҳам бошқа ҳуқуқ-тартибот идоралари билан ҳамкорликда тезкор тадбирлар ўтказган.

Жумладан, Қамаши туманидаги чорвачиликка ихтисослашган фермер хўжалик раҳбари мазкур тумандаги кластерга тегишли 66,32 гектар яйлов ерларидан иккиламчи ижара шартномаси асосида фойдаланиб келаётган бўлса-да, ушбу шартномани бекор қилиб, кластер раҳбарлари орқали 57 гектар яйловни харидор номига ижара асосида расмийлаштириб бериш эвазига 500 млн сўм талаб қилади. Аммо, у сўралган пул маблағи ҳисобидан 20 минг АҚШ доллари ва 100 млн сўм олган вақтида ашёвий далиллар билан ушланди.

Шаҳрисабз туманидаги агрофирма раҳбари туман ҳокимлиги захирасида бўлган 50 гектар суғориладиган ер майдонини мансабдор танишлари орқали харидорга бир йил муддатга тегишли ҳужжатларсиз фойдаланиш учун олиб бериш эвазига 500 млн сўм талаб қилиб, шундан 100 млн сўм олган вақтида ушланган. Терговга қадар текширув давомида у мазкур пул маблағининг бир қисмини ўзининг жиноий шериги бўлган, пахта ва ғалла етиштиришга ихтисослашган фермер хўжалиги раҳбарига бериши керак бўлгани аниқланиб, ушбу шахс ҳам 20 млн сўм олган вақтида ушланган. Агрофирма раҳбари ҳам, кластер раҳбари ҳам муқаддам судланган бўлган.

Сурхондарё вилояти Қизириқ туманида яшовчи 1975 йилда туғилган фуқаро ўз турмуш ўртоғига туман ҳокимининг 2010 йилдаги қарори остида деҳқон хўжалиги ташкил этиш учун 49 йил муддатга ижарага берилган 30 сотих ер майдонини 40 сотих деб кўрсатиб, харидорга 280 млн сўмга сотишга келишади. Ҳуқуқ-тартибот органлари ўтказган тезкор тадбир вақтида у сўралган пул маблағини олган вақтида ашёвий далиллар билан ушланган.

Ҳозирда юқоридаги ҳолатлар бўйича жиноят ишлари очилган.