Австрия ТИВ собиқ раҳбари Россияга кўчиб ўтди

Австрия собиқ ташқи ишлар вазири Карин Кнайсл Россия Федерациясига бутунлай кўчиб ўтганини маълум қилди, дея хабар бермоқда ТАСС Россия давлат агентлиги собиқ сиёсатчининг 3 март, якшанба куни Бутунжаҳон ёшлар фестивали доирасидаги нутқига асосланиб.

«Мен Россияга кўчиб ўтдим, чунки у ҳақиқатан ҳам эркин мамлакат», деди Кнайсл ўзининг маърузаларидан бирида. У, шунингдек, қолиб яшаш учун «Россиянинг шарқий қисмида уй қурмоқчи бўлган жойни кўзи остига олиб қўйганини» айтди. «Мен шаҳарда яшайдиганлардан эмасман», деди у. 

Кнайсл фуқаролигини ўзгартириш ниятида эмас 

Австрия ташқи ишлар вазирлигининг собиқ раҳбари фуқаролик берадиган ҳуқуқ ва мажбуриятлар фақат битта давлат билан боғлиқ бўлиши керак, деб ҳисоблаб, Россия паспортини олишни режалаштирмаётганини айтди. «Фуқароликни шунчаки ўзгартириб бўлмайди. Агар шундай қилсам, битта фуқароликни танлаш керак бўлади. Мен жуда консервативман, лекин бир вақтнинг ўзида иккита паспортга эга бўлиш кўпхотинлиликда яшаш ва икки киши билан турмуш қуришга ўхшайди», - дея унинг сўзларидан иқтибос келтиради ТАСС. 

Ўтган ёзда, агентликнинг аниқлик киритишича, Кнайсл россиялик бўлиш учун рус тилини тўғри ўрганиши кераклигини айтган. Унинг сўзларига кўра, биринчи навбатда «Уруш ва тинчлик»ни тугатиши керак, Достоевскийни ва Чеховнинг камида иккита асарини ўқиш керак, кейин бу ҳақда суҳбатни бошлаш мумкин бўлади». Кнайсл сўзларига кўра, рус тилини ўрганяпти, аммо унда гапиришга ўзида ҳали ишонч ҳис қилмаяпти.

Рязан яқинидаги Кнайсл уйи ижарага олинган 

2023 йил август ойида Карин Кнайсл Рязан вилояти Касимовский тумани Петрушово қишлоғида уйни ижарага олди, дея хабар беради «Вид сбоку» маҳаллий онлайн газетаси. Нашрнинг аниқлик киритишича, у илгари бир муддат Қуйи Австриядаги Зайберсдорф шаҳрида яшаб, кичик фермани бошқарган. «Мен эски ҳаётимни тарк этишимга, ҳаммасини бошидан бошлашга мажбур бўлдим, 60 ёшда бу осон эмас», деб қўшимча қилди австриялик собиқ сиёсатчи. 

Американинг The Washington Post газетаси 2022 йил июл ойида мақола чоп этиб, унда Австрия собиқ ташқи ишлар вазири таҳдидлар туфайли ўз фуқаролиги давлатини тарк этгани ҳақида хабар берган эди. Ўша куни Кнайслнинг ўзи Х ижтимоий тармоғидаги шарҳларидан бирида «доимий ҳужумлар» туфайли 2020 йил сентябр ойида Австрияни тарк этганини тушунтирди. 

2022 йил май ойининг охирида Кнайсл «Роснефт» директорлар кенгашидаги лавозимидан бош тортгани маълум бўлди. У Россия давлат концернида бир йилга яқин лавозимда ишлаган. 

Кнайсл G.O.R.K.I. марказини бошқаряпти

Карин Кнайсл 1965 йилда Вена шаҳрида туғилган, Вена университетида таҳсил олган, 2017-2019 йилларда Австрия Ташқи ишлар вазирлиги раҳбари лавозимида ишлаган. Австрияда у Россиянинг Украинага қарши урушига қарамай, Россия давлат концерни - «Роснефт»да ишлашда давом этгани учун танқид қилинди.

2018 йил август ойида Кнайслнинг тўйида Россия президенти Владимир Путин иштирок этди ва у билан рақсга тушди. Ўшанда у оммавий ахборот воситаларига ҳукуматдаги ҳамкасбларини ва ўша пайтда Австрияга ташриф буюрган Путинни тадбирга тасодифан таклиф қилганини айтди.

Der Spiegel нашри 2023 йилнинг 17 июнида собиқ вазир G.O.R.K.I. маркази раҳбари бўлганини хабар қилди. У Санкт-Петербург давлат университети бўлиб, ўзини «Россия ривожланишининг асосий масалалари бўйича геосиёсий обсерватория» сифатида кўрсатади.