10 минг киши яшаши мумкин бўлган 4 минггача уй сув тошқини зонасига тушиши мумкин.
Россиянинг Оренбург вилояти, Орск шаҳрида тўғон ёрилди. Шаҳар аҳолиси эвакуация қилинмоқда. 4 мингга яқин хусусий турар-жой бинолари сув босиши хавфи остида.
Аввалроқ Орскда сув тошқини туфайли фавқулодда ҳолат жорий этилган эди. Фавқулодда вазиятлар вазирлиги хабарига кўра, қутқарувчилар тўғонни мустаҳкамлаш ишларини олиб бормоқда.
«Тўғон ёрилиши, биринчи навбатда, Орскнинг хусусий секторига таҳдид солади; 10 минг киши яшаши мумкин бўлган 4 минггача уй сув тошқини зонасига тушиши мумкин. Қутқарувчилар гуруҳи кучайтирилди, ишга оғир юк машиналари қўшилди», дейилади ФВВ хабарида.
Орск маъмурияти маҳаллий вақт билан соат 18:00 да «тўғон бузилиши хавфи туфайли» аҳоли эвакуация қилинишини эълон қилди. Аҳолига ҳужжатларни тўплаш ва 6 та вақтинчалик жойлаштириш марказига кўчиб ўтиш тавсия қилинди. «Бу гидротехник иншоот эмас. Тўғон шаҳар чеккасидаги сув оқими ҳаракатини тартибга солиш учун мўлжалланган эди», деб хабар берди вилоят маъмурияти.
Оренбург вилоятида об-ҳаво исиши туфайли дарёлардаги сув сатҳи кескин кўтарилган. Оқибатда 95 та аҳоли пункти ҳудудида 1825 та турар-жой биноси ва 5242 та томорқа ерлари сув остида қолган. 4 апрелга ўтар кечаси Урал дарёсидаги Ириклинский сув омборидан сув оқими секундига 890 дан 1672 куб метргача кўтарилди. Вилоятда фавқулодда ҳолат режими жорий этилди.
