Тошкентда профилактика инспектори маст эркак томонидан пичоқланди

Тошкент шаҳрининг Янгиҳаёт туманида профилактика инспектори пичоқланди. Бош прокурорнинг матбуот котиби Ҳаёт Шамсуддинов ҳолат юзасидан расмий маълумот берди.

Маълум қилинишича, 14 апрел куни Янгиҳаёт тумани ИИБ ХПБ профилактика инспекторлари бир хонадонда жанжал бўлаётгани ҳақидаги хабарга аниқлик киритиш мақсадида етиб келишган. Шу пайт хонадон эгаси маст ҳолда хизмат вазифасини бажараётган ички ишлар ходимларига қаршилик кўрсатиб, профилактика инспекторларидан бирининг кўкрак қафасига ошхона пичоғи билан бир маротаба уриб, тан жароҳати етказган.

Тан жароҳати олган профилактика инспектори шифохонага олиб борилган ва унга тиббий ёрдам кўрсатилган.

Ҳолат юзасидан Жиноят кодексининг 105- (қасддан баданга ўртача оғир шикаст етказиш) ва 219- (ҳокимият вакилига ёки фуқаровий бурчини бажараётган шахсга қаршилик кўрсатиш) моддалари билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Тошкент туманида оилавий жанжал бўйича чақирув олган профилактика катта инспектори пичоқлангани хабар қилинганди.