Россия Черкаск ва Днипропетровск вилоятларига ракета зарбалари берди. Полтава, Суми ва Киев вилоятларида ҳам ракета таҳдиди эълон қилинди. Черкаск вилоятида муҳим инфратузилма объекти зарар кўрган.
Украинанинг Черкаск вилоятида шу номдаги туманда Россия ҳужуми натижасида, дастлабки маълумотларга кўра, муҳим инфратузилма объекти зарар кўрган. Бу ҳақда Telegram-каналида 25 апрел, пайшанба куни эрталаб вилоят ҳарбий бошқармаси (ВҲБ) раҳбари Игор Табурец маълум қилди.
«Эрталаб душман бизнинг Черкаск вилоятига ҳужум қилди, ҳаво ҳужумидан мудофаа тизими юқори тезликдаги ҳаво нишонига қарши ишлади», деб ёзди у. Табурецнинг сўзларига кўра, Россия ҳаво ҳужумидан сўнг олти киши тиббий ёрдамга мурожаат қилган, бироқ қурбонлар йўқ.
Айни вақтда, Украинанинг Liga.net интернет-нашри ўз мухбирига таяниб, 25 апрелга ўтар кечаси Черкаск вилоятининг Смела шаҳрида портлаш овозлари эшитилганини хабар қилди. Тахминан соат 5:30 да Украина Қуролли кучлари Ҳаво кучлари Telegram’да Черкаск ва Киев вилоятларидаги ракета хавфи ҳақида хабар берди. Икки дақиқадан сўнг Черкаск йўналишидаги «тезкор нишон» ҳақида хабар эълон қилинди.
Шу куни кечқурун Украина Ҳаво кучлари Полтава ва Суми вилоятларида ракета таҳдиди ва Миргород йўналишидаги «тезкор нишон» ҳақида хабар берган эди. Соат 5:44 да тревога бекор қилинди.
Днипропетровск ВҲБ раҳбари Сергей Лисак ҳам Telegram-каналида Россия Қуролли кучларининг минтақага тунги ҳужуми ҳақида хабар берди.
Унинг сўзларига кўра, «Никополнинг ўзи, Марганец ва Красногригоревск йўналишида артиллерия ўт очган». Ҳаво ҳужуми натижасида газ қувурида ёнғин юзага келган, шунингдек, иккита хусусий уй, иссиқхона, ёдгорлик, электр узатиш линиялари ва кўчаларни ёритиш устуни ҳам зарар кўрган. Синелниково шаҳри яқинидаги хусусий уй ҳам зарар кўрган, деди Лисак. Днипропетровск вилоятида қурбонлар қайд этилмаган.
