Россияда электрон чақирув тизими 1 ноябрдан иш бошлайди

Россияда электрон ҳарбий рўйхатга олиш тизими 2024 йил 1 ноябрдан, яъни кузги чақирув даврида иш бошлайди, бу ҳукуматнинг 27 апрел куни эълон қилинган «Ҳарбий хизматни ўташга мажбур бўлган фуқаролар тўғрисидаги маълумотларнинг ягона реестри» тўғрисидаги қарорида айтилган.

Хизмат бошқа давлат маълумотлар базаларидан, шу жумладан Давлат хизматлари сервиси, «ФСБ», Ички ишлар вазирлиги, Солиқ хизмати, миграция ва рўйхатга олиш базаларидан шахс ҳақидаги маълумотларни тўплайди. Ҳарбийлар ҳарбий хизматни ўташга мажбур бўлган шахснинг жиноий ва маъмурий ишлари, унинг кўчмас мулки ва бошқа мол-мулки тўғрисидаги маълумотлардан фойдаланиш имкониятига эга бўлади. Россия Федерацияси Мудофаа вазирлигининг маълумотлар базаси ҳарбий хизматга мажбур бўлган шахс тўғрисидаги ёзув, шунингдек, яшаш жойи тўғрисидаги маълумот, шу жумладан рўйхатга олиш жойида бўлмаган ахборотларни ўз ичига олади. 

Электрон ҳарбий ҳисобга олиш ёзувларини ишлаб чиқиш 31 октябргача якунланиши керак. 1 ноябрдан Мудофаа вазирлиги реестрдан фойдаланишни бошлайди, дейилади қарорда. Ягона ҳарбий рўйхатга олиш реестрини яратишни назарда тутувчи қонун президент Владимир Путин томонидан ўтган йилнинг апрел ойида имзоланган эди. Унинг ишлаб чиқилиши Россияда Украинадаги уруш учун эълон қилинган сафарбарлик фонида бошланди. Қонун чиқарувчиларнинг таъкидлашича, электрон чақирув қоғозлари бу йилги баҳорги чақирув пайтида ҳам юборилган. 

1 ноябрдан электрон чақирув тизими ишга тушади 

Ҳарбий хизматга мажбурларни реестрдаги ҳар қандай ўзгаришлар тўғрисида хабардор қилишнинг асосий тизими «Давлат хизматлари» бўлади, дейилади қарорда. Портал орқали олинган чақирув топширилган ҳисобланади, агар у эътиборга олинмаса, чекловлар қўлланади. 

Агар шахс рўйхатга олинганидан кейин 7 кун ичида электрон чақирув бўйича ҳарбий комиссарликка келмаса, у автоматик равишда Россиядан чиқиб кетиш, чет эл паспортини олиш, якка тартибдаги тадбиркор сифатида рўйхатдан ўтиш, кўчмас мулк билан боғлиқ операциялар, транспорт воситаларини бошқариш ва уларни рўйхатдан ўтказиш, шунингдек кредитлар олиш ҳуқуқини йўқотади. 

«Ҳозирга қадар ҳарбий хизматга чақирилувчилар қонунчиликда тақиқланганига қарамай, мамлакатдан хавфсиз чиқиб кетиши мумкин эди. Бу ҳарбий комиссарлик ва чегара хизмати ўртасида ҳарбий хизматга чақирилувчилар ҳақида маълумот алмашиш канали йўқлиги туфайли мумкин бўлган. Реестр ишга туширилиши билан чақирув қоғози жўнатилган чақирилувчилар ҳарбий комиссарликка келгунига қадар мамлакатни тарк этиш имкониятидан автоматик равишда маҳрум бўлади», — дейилади «Военные адвокаты» лойиҳасида.