Литва Латвия ортидан Беларус давлат рақамларига эга бўлган автомобилларнинг мамлакатга киришига тақиқ жорий қилди. Литва божхона сайтида 17 июл, чоршанба куни хабар қилинганидек, тақиқ 18 июл куни маҳаллий вақт билан соат 00.00 да кучга киради. Бу енгил автомобилларга, уларнинг эгаси ёки ҳайдовчиси фуқаролигидан қатъи назар, амал қилади. Фақат дипломатик транспорт воситалари учун истисно мавжуд.
Литва ҳудудида бўлган автомобиллар 2025 йил 18 январгача олиб чиқилиши ёки қайта рўйхатдан ўтказилиши керак. Автомобил эгалари буни қилмаса, жаримага тортилади ва автомобил мусодара қилинади.
Тақиқ бир ойдан кейин тўлиқ кучга киради
Литва божхона қоидаларига кўра, 16 августга қадар Беларус автомобиллари, агар улар сотиш учун мўлжалланмаган бўлса ва амалдаги визаси ёки яшаш учун рухсатномаси бўлган беларусларга тегишли бўлса, мамлакатга кириши мумкин. Ушбу вақтинчалик истисно юридик шахсларга тааллуқли эмас. 16 августдан кейин кириш тақиқи тўлиқ амал қилади.
16 июлдан бошлаб Латвияда Беларусда рўйхатдан ўтган автомобилларнинг киришига тақиқ жорий этилди. Рига бу қарорини ЕИ томонидан Россия ва Беларусга нисбатан киритилган санкцияларни четлаб ўтиш хавфини камайтириш зарурати билан изоҳлади.
