Темурбеклар мактаби битирувчилари учун алоҳида қўшимча квота ажратилади

Олий таълим, фан ва инновациялар вазирлиги қуйидагиларни Ўзбекистон Республикаси таълим ташкилотларига қабул қилиш бўйича давлат комиссиясига (кейинги ўринларда – Давлат комиссияси) тақдим этади:

а) уч кун муддатда:

давлат буюртмасининг тақсимотида иштирок этиш истагини билдирган ҳамда талабалар қабулини давлат олий таълим муассасалари учун ўрнатилган тартиб ва шартларда амалга оширувчи нодавлат олий таълим ташкилотлари рўйхатини;

давлат олий таълим муассасалари ва давлат буюртмасининг тақсимотида иштирок этувчи нодавлат олий таълим ташкилотларининг таклифларига асосан 2024/2025 ўқув йили учун олий таълим муассасалари, таълим шакллари ва таълим тиллари кесимидаги умумий қабул параметрлари бўйича таклифларни;

б) бир ҳафта муддатда:

республикада фаолият юритаётган хорижий олий таълим ташкилотлари ва уларнинг филиаллари ҳамда нодавлат олий таълим ташкилотларига ажратилган 1200 та давлат грантининг тақсимоти юзасидан таклифларни;

Оила ва хотин-қизлар қўмитаси билан биргаликда хотин-қизлар учун ажратилган 2000 та давлат грантининг тақсимоти юзасидан таклифларни;

ўзбек тили ва адабиёти, тарих, маданият, санъат ва ҳунармандчилик йўналишларида ўқиш истагини билдирган, хорижда истиқомат қилаётган ёш ватандошлар учун 30 та давлат гранти бўйича таклифларни.

Давлат комиссияси бир ҳафта муддатда 2024/2025 ўқув йили учун:

а) бакалавриат таълим йўналишига қабул бўйича:

олий таълим муассасалари, таълим шакллари ва таълим тиллари кесимидаги умумий қабул параметрларини;

имтиёзга эга абитуриентлар учун қўшимча қабул параметрларини;

тегишли бакалавриат таълим йўналишининг олдинги ўқув йилидаги ўртача ўтиш балларини ҳисобга олган ҳолда давлат гранти ва тўлов-контракт асосида ўқишга қабул қилишнинг минимал ўтиш баллини;

ҳудудлар, соҳалар ва тармоқларнинг олий маълумотли кадрларга бўлган эҳтиёжини таъминлаш учун давлат органлари ва ташкилотлари ҳамда устав фондида (устав капиталида) давлат улуши 50 фоиз ва ундан ортиқ бўлган хўжалик жамиятлари буюртмаларига мувофиқ, умумий давлат гранти асосидаги қабул параметрлари доирасида мақсадли қабул квоталарини ва ушбу квоталарнинг туман (шаҳар)лар кесимидаги тақсимотини;

ҳар бир бакалавриат таълим йўналиши бўйича олий таълим ташкилотининг умумий қабул параметрига нисбатан давлат гранти квотасининг улушини таълим соҳалари (бакалавриат таълим йўналишлари) кесимида;

б) магистратура мутахассисликлари бўйича қабул параметрларини давлат гранти ва тўлов-контрактга ажратган ҳолда олий таълим муассасалари ва тиллар кесимида тасдиқлайди.

Давлат олий таълим муассасаларига киришда тўплаган баллига нисбатан маълум миқдордаги қўшимча балл бериладиган шаклдаги имтиёзга эга абитуриентлар 2024/2025 ўқув йилида танлаган таълим йўналиши бўйича белгиланган ўтиш балли ва ундан юқори балл тўплаган тақдирда, тўплаган баллига мос равишда давлат гранти ёки тўлов-контракт асосида қўшимча квота билан талабаликка тавсия этилиши белгиланган.

«Эндиликда қўшимча балл бериладиган имтиёзлар, энг асосийси Темурбеклар мактаби битирувчилари агар ўтиш балли учун етарли балл тўплай олса, унда улар учун қўшимча квота ажратилади. Бунда олдиндан қўшимча квота сони маълум қилинмайди, чунки неча нафар битирувчи ўқишга кира олиши олдиндан маълум бўлмайди. Мандатдан кейин имтиёзлиларга нечта грант ёки нечта контракт ажратилиши аниқ бўлади», дея фармойиш юзасидан изоҳ қолдирган ҳуқуқшунос блогер Хушнудбек Худойбердиев ўз телеграм-каналида.