Марказий банк асосий ставкани йиллик 0,5 фоиз бандга пасайтирди

Марказий банк бошқаруви 2024 йил 25 июлдаги йиғилишида асосий ставкани 0,5 фоиз бандга пасайтириб, йиллик 13,5 фоиз даражасида белгилаш тўғрисида қарор қабул қилди.

Базавий инфляциянинг пасаювчи динамикаси давом этиб, июнда 5,9 фоизга тенг бўлган ва йил бошидан 2,6 фоиз бандга пасайган. Бу энергия тарифлари ўзгаришининг иккиламчи таъсири кутилганидан паст бўлгани билан изоҳланиб, инфляциянинг келгусида ҳам пасаювчи трендининг давом этишига ишора беради.

Жорий йилнинг II чорагида иқтисодиётга турли каналлар орқали валюта оқимининг сезиларли ошиши кузатилиб, сўм алмашув курсининг барқарорлашишига ижобий таъсир кўрсатган.

Тадбиркорларнинг иқтисодий фаоллиги ва ишбилармонлик кайфияти бўйича индексларда сўнгги икки ойда нисбатан пасайиш кузатилган бўлса-да, ижобий натижалар сақланиб қолмоқда.

Жорий йилдаги базавий инфляция тенденцияси ва инфляцион омиллар таъсирининг кутилганидан пастроқ бўлиши ҳисобига инфляция прогнози пасайиш томонга қайта кўриб чиқилди. Йил якунида умумий инфляциянинг 9 фоиз атрофида шаклланиши (апрелдаги прогноз 9-11 фоиз эди) ва 2025 йил охирида 5 фоизлик таргет даражасига яқинлашиши кутилмоқда.