Пентагон раҳбари АҚШ ҳарбийларига ҳужум қилмаслик ҳақида огоҳлантирди

Қўшма Штатлар Яқин Шарқда хизмат қилаётган ҳарбий хизматчиларига амалга оширилган ҳужумларга тоқат қилмайди.

Бу ҳақда АҚШ мудофаа вазири Ллойд Остин Ироқдаги «Айн ал-Асад» базасига қилинган ҳужум натижасида америкалик армия аскарларининг жароҳат олганини изоҳлар экан, айтиб ўтди.

Унинг сўзларига кўра, ҳужум ортида Эрон томонидан қўллаб-қувватланган шиа жангчилари турибди. Бироқ воқеа юзасидан тергов ҳали якунланмагани учун у аниқ бир гуруҳ номини айтмади.

Пентагон раҳбарининг таъкидлашича, Қўшма Штатлар Исроилни ҳимоя қилиш учун Яқин Шарқдаги ҳарбий иштирокини кучайтирмоқда.

Шу билан бирга, у вазият кескинлашувининг пасайиши минтақадаги барча мамлакатларга фойда келтиришини таъкидлади. Остиннинг қўшимча қилишича, Қўшма Штатлар бу йўналишда фаол ҳаракат қилмоқда.