Грецияда ўрмон ёнғинлари авж олди

Афина шимолида катта ёнғин давом этмоқда: тутун кўтарилиб, ёнғиндан 30 километр жанубда жойлашган Греция пойтахтига етиб борган. Грециянинг бир қанча қишлоқ ва шаҳарлари аллақачон эвакуация қилинган. 11 август, якшанба куни кечқурун Греция телевидениеси хабар беришича, юзлаб маҳаллий аҳоли ўт ўчириш машинаси ва полиция томонидан хавфсиз жойга олиб кетилди.

Греция ОАВ биноларнинг вайронагарчиликлари ёки шикастланиши ҳақида маълумот бермаган ҳолда, кўплаб ёнғин ҳидидан жабрланганлар касалхонага ётқизилганини билдирди. Шу билан бирга, телевидение мухбирлари ўнлаб уйлар ёнаётганини кўрганликларини маълум қилишди. Баъзиларида одамлар олов яқинлашаётганига қарамай, уйларини тарк этишдан бош тортган ва ўз мулкларини боғ шланглари билан сақлаб қолишга ҳаракат қилган, дея хабар беради ОАВ.

«Олов баландлиги 25 метрдан ошади», - дея AFP ўт ўчириш бригадаси вакилининг Греция радиосига берган баёнотини келтирган. Унинг сўзларига кўра, қуёш ботгунга қадар 29 та ўт ўчириш самолёти ва вертолётлари ишга туширилган, ёнғинни ўчиришга 110 та техникада бир неча юз нафар ўт ўчирувчи ва кўплаб кўнгиллилар жалб этилган. Хабар қилинишича, дастлаб туристик жойлар хавф остида бўлмаган.

Грецияда ёнғин хавфи ҳақида огоҳлантириш берилган

Метеорологлар дам олиш кунлари қурғоқчилик ва Эгей денгизидаги кучли шамоллар бир неча дақиқа ичида кичик ёнғинни катта ёнғинга айлантириши мумкинлиги ҳақида огоҳлантирган, деб ёзади AFP. Бироқ йирик ёнғин сабаблари ҳозирча номаълумлигича қолмоқда. 

Мамлакат фуқаро мудофааси хизмати вакилларининг сўзларига кўра, яқин кунларда вазият ўта хавфли бўлиб қолади. Грециянинг аксарият ҳудудларида бир неча ойдан бери нормал ёғингарчилик кузатилмаяпти, 12 август куни Грецияда ҳаво ҳарорати Целсий бўйича 39 даражага етиши кутилмоқда. Мамлакат ғарбида энг кучли жазирама кузатилмоқда ва 15 августга қадар бундай об-ҳаво шароити ўрмон ёнғинлари учун қулай бўлади. Кучли шамол ва ҳаддан ташқари қурғоқчилик туфайли «Греция ярми қизил зонада» бўлиб турибди.

11 август куни баъзи жойларда шамол тезлиги соатига 90 километрга етди, бу ўтган кунни ёнғин ўчириш учун энг қийин кун деб ҳисоблашга асос бўлади. Тарихдаги энг иссиқ қишдан сўнг, Греция 1960 йилдан бери энг иссиқ июн ва июл ойларини бошдан кечирди ва бу ўрмон ёнғинларига туртки берди.

Расмийлар Марафон шаҳрини эвакуация қилишни буюрди

Греция ҳукумати 11 август куни Афина яқинида жойлашган тарихий Марафон шаҳрини ўрмон ёнғинлари хавфи юқорилиги сабабли эвакуация қилишни буюрди. 30 мингдан ортиқ шаҳар аҳолиси денгиз бўйидаги Неа Макри шаҳарчасига эвакуация қилинди, деб хабар берди ўт ўчириш бригадаси. AFP қайд этишича, Греция бош вазири Кириакос Мицотакис таътилини тўхтатиб, пойтахтга қайтган.

11 август куни тушга қадар ўт ўчирувчилар сўнгги 24 соат ичида содир бўлган 40 та ёнғиндан 33 тасини назорат остига олдилар, деди ўт ўчириш бригадаси вакили журналистларга. Бироқ еттита ёнғин ҳалигача ўчирилмаган, жумладан Салоники туманининг Лангадас шаҳрида ҳам, деди у.