«Медуза» асосчиси Галина Тимченко Россияда «чет эл агенти» деб эълон қилинди

Россия Адлия вазирлиги «Медуза» интернет-нашрининг ношири ва асосчиси Галина Тимченко ва «Свободный университет» профессори, ҳуқуқшунос Елена Лукяновани «чет эл агентлари» рўйхатига киритди. Бу ҳақда 30 август, жума куни идора сайтида хабар берилди.

Адлия вазирлиги ўз қарорини Тимченко ва Лукянова бошқа «чет эл агентлари» материалларини яратиш ва тарқатишда иштирок этгани, шунингдек, Россия расмийларининг қарорлари ва сиёсати ҳақида «ишончсиз маълумот» тарқатганлиги билан изоҳлади. Бундан ташқари, Тимченко Россия армиясининг «салбий имижини яратишга қаратилган ноаниқ маълумотларни» тарқатган, Лукянова эса Россия ҳудудида «номақбул» деб ҳисобланган ташкилотлар билан алоқа қилган. Адлия вазирлигига кўра, Лукянова ҳам, Тимченко ҳам Россия Федерациясидан ташқарида яшайди, иккаласи ҳам Россия қўшинларининг Украинага ҳужумига қарши бўлган.

Бундан ташқари, «Гражданская инициатива против экологической преступности» нотижорат ташкилоти ва «Коалиция Новосибирск 2020» уюшмаси «чет эл агентлари» реестрига киритилган. Адлия вазирлиги улар Россия ҳукумати ҳақида «нотўғри маълумотлар» ва «чет эл агентлари» материалларини тарқатганини, шунингдек, Украинадаги урушга қарши эканлигини билдирди.

Россияда «чет эл агентлари» тўғрисидаги қонун 

Россияда «чет эл агентлари» тўғрисидаги қонун 2012 йилда пайдо бўлган. Ўшандан бери бир неча юзлаб ташкилотлар ва шахслар тақиқланганлар рўйхатига киритилган. Жисмоний шахслар – «чет эл агентлари» реестри 2022 йил апрел ойи бошида ишга туширилган бўлиб, у ННТ– «чет эл агентлари», ОАВ – «чет эл агентлари» ва рўйхатдан ўтмаган ташкилотлар – «чет эл агентлари» рўйхати билан бир қаторда тўртинчи рўйхат бўлди. 

2022 йил декабр ойидан бошлаб қонун Россия расмийларига кўра, «чет элдан ёрдам оладиган» ва «хорижий таъсир остида» бўлганларни «чет эл агентлари» деб эълон қилиш имконини беради.

2024 йил март ойида Россия президенти Владимир Путин Россия фуқаролари ва компанияларига «чет эл агентлари» ресурсларида – уларнинг веб-сайтларида, ижтимоий тармоқларида, блогларида ва бошқа платформаларида реклама жойлаштиришни тақиқловчи қонунни имзолади. Янги қонун, шунингдек, «чет эл агентлари» ресурсларини оммавий ахборот воситалари ва интернетда реклама қилишни ҳам тақиқлайди.