Узунлиги қарийб 302 метр бўлган кема Дестин шаҳридан тахминан 40 километр жануби-ғарбда денгиз тубига туширилади. Лойиҳа ташаббускорлари лайнер денгиз жонзотлари учун янги яшаш муҳитига, ғаввослар учун эса йирик сайёҳлик объектига айланишига умид қилмоқда.
Маҳаллий ҳокимият ҳисоб-китобларига кўра, бу дайвинг анжомлари дўконлари, балиқ овлаш саёҳатларини ташкил этувчи компаниялар ва меҳмонхоналарга ҳар йили миллионлаб доллар даромад келтириши мумкин.
Илк рейсдаёқ рекорд ўрнатган кема
SS United States 1952 йилдаги биринчи рейсида Атлантика океанини уч кун, 10 соат ва 40 дақиқада кесиб ўтиб, тезлик рекордини ўрнатган. У Queen Mary лайнерининг аввалги натижасини тахминан 10 соатга яхшилаган.
Шу тариқа кема йўловчи лайнерларининг энг тез трансатлантик ўтиши учун бериладиган «Атлантиканинг мовий тасмаси» мукофотини қўлга киритган.
Бироқ вақт ўтиши билан йўловчиларнинг транспорт танлови ўзгарган ва лайнерга талаб пасайган. 1969 йилда, 17 йиллик хизматдан сўнг, у эксплуатациядан чиқарилган. Кейинги ўн йилликларда кема бир неча бор эгасини алмаштириб, аста-секин яроқсиз ҳолга келган.
Қайта тиклаш режалари нега амалга ошмади?
Тарихий мерос ҳимоячилари кўп йиллар давомида лайнерни сақлаб қолиш ва тиклашга уринган. Аммо уни таъмирлаш ва сақлаш харажатлари жуда катта бўлган.
Филадельфиядаги причал эгаси билан ижара ҳақи бўйича низо эса кемани асраш билан шуғулланган SS United States Conservancy ташкилотини уни сотишга мажбур қилган.
Лайнерни Окалуса округи сотиб олган. 2025 йил 19 февралда у Филаделфиядан буксирда олиб чиқилиб, Алабама штатидаги Мобил шаҳрига йўл олган.
Экологик хавотирлар ҳам бор
Айрим экологик ташкилотлар ва олимлар кема корпусига суртилган, таркибида рух хромати бўлган грунт қопламаси Мексика қўлтиғи сувларини ифлослантириши мумкинлигидан хавотир билдирган.
Окалуса округи маъмурияти эса лойиҳа АҚШ Атроф-муҳитни муҳофаза қилиш агентлиги — EPA талабларига мос эканини маълум қилган. 2025 йил августда федерал суд лайнерни чўктиришнинг олдини олиш мақсадида киритилган даъвони рад этган.
