CGTN хабарига кўра, ҳар бири 500 метрлик сўнгги жуфт пўлат релс Сичуан ва Юннан провинциялари чегарасидаги Цзюнлян туннелига ётқизилган.
Бу ишлар линияни фойдаланишга топширишга тайёрлашнинг муҳим босқичи бўлди. Темирйўл идоралари прогнозига кўра, магистрални тўлиқ ишга тушириш 2027 йилнинг биринчи ярмига мўлжалланган.
Линия Чунциндаги Чунцинси станциясини Кунминдаги Кунминнан станцияси билан боғлайди. Йўналиш Чунцин шаҳри, Сичуан, Гуйчжоу ва Юннан провинциялари ҳудудидан ўтади.
Магистрал мураккаб геологик шароитга эга Умэншан тоғларини кесиб ўтади. Шу сабабли йўлнинг катта қисми кўприк ва туннеллардан иборат бўлиб, уларни қуриш жиддий муҳандислик вазифаларини ҳал этишни талаб қилган.
Линия тўлиқ фойдаланишга топширилгач, Чунцин ва Кунмин ўртасидаги сафар вақти тахминан 2,5 соатгача қисқариши кутилмоқда.
Чунцин — Кунмин магистрали Пекин — Кунмин темирйўл коридорининг муҳим қисми ҳисобланади. У Хитойнинг саккизта шимол–жануб ва саккизта шарқ–ғарб йўналишини қамраб олган миллий юқори тезликдаги темирйўл тармоғига киради.
Янги линия Чэнду — Чунцин иқтисодий кластери билан Юннаннинг марказий қисмидаги шаҳарлар ўртасидаги алоқаларни кучайтириши, савдо ва туризм ривожига ёрдам бериши кутилмоқда.
