РФ Адлия вазирлиги ёзувчиларни ва «Досье» марказини «чет эл агентлари» деб эълон қилди

Россия Федерацияси Адлия вазирлиги 27 сентябр, жума куни Россиядаги коррупция, Россия махсус хизматлари ва Кремлнинг хориждаги ташвиқотига оид суриштирувларни нашр этувчи «Досье» марказини чет эл агентлари реестрига киритди.

Адлия вазирлигининг янгиланган рўйхатида Freedom Letters нашриёт уйи асосчиси Георгий Урушадзе, ёзувчи ва адабиётшунос Александр Генис, маданиятшунос Александр Эткинд, америкалик тарихчи Юрий Фелштинский, ёзувчи ва журналист Сергей Гуляев ҳам бор.

Урушадзе томонидан асос солинган Freedom Letters нашриёти «Россия Федерациясида тақиқланган матнларни» нашр этади, дейилади лойиҳа сайтида.

Александр Эткинд — рус интеллектуал тарихи бўйича тадқиқотлари билан машҳур маданият мутахассиси. Унинг сўнгги китоблари орасида - Россиянинг Украинага тўлиқ бостириб киришидан кейин ёзилган «Россия замонавийликка қарши».

Юрий Фелштинский разведка хизматларининг Россия сиёсатига таъсири ҳақидаги китоблари билан машҳур. Унинг энг машҳур матнларидан бири - 2006 йилда Лондонда заҳарланган собиқ «ФСБ» зобити Александр Литвиненко билан биргаликда ёзилган «ФСБ Россияни портлатяпти».

Александр Генис — 1977 йилда АҚШга кўчиб кетган рус ёзувчиси ва журналисти. У матбуот билан 40 йилдан ортиқ ҳамкорлик қилиб келади.