“Telegram фойдаланувчилари аккаунтлари бўйича ҳукуматдан сўров келганини била олади” — Павел Дуров

Telegram асосчиси Павел Дуров 2018 йилдан бери мессенжер кўпчилик мамлакатлардаги махфийлик сиёсатига кўра, жиноятчиларнинг IP манзиллари/телефон рақамларини расмийларга ошкор қила олишини маълум қилди.

“Бизга тегишли алоқа линиялари орқали тўғри шаклланган юридик сўров келиб тушганда, биз уни текшириб, хавфли жиноятчиларнинг IP манзилларини/телефон рақамларини ошкор қиламиз. Бу жараён ўтган ҳафтадан анча олдин амалга оширилган эди”, — деб ёзган Дуров ўзининг каналида.

Маълум қилинишича, мессенжердаги https://t.me/transparency боти айнан ушбу фойдаланувчининг маълумотлари учун қайта ишланган (ҳукумат) сўровлар сонини кўрсатади.

“Масалан, Бразилияда биз 2024 йилнинг 1-чорагида (январ-март) 75 та, 2-чоракда 63 та ва 3-чоракда 65 та юридик сўровлар бўйича маълумотларни ошкор қилдик. Энг йирик бозоримиз бўлган Ҳиндистонда биз 1-чоракда 2461 та, 2-чоракда 2151 та ва 3-чоракда 2380 та юридик сўровни қондирдик”, — деган Павел.

Шунингдек, Европада ҳам 3-чоракда қабул қилинган қонуний сўровлар сони кўпайиши кузатилган.

“Бу ўсишга кўпроқ Евроиттифоқ маъмурлари ўз сўровлари учун EI DCA қонунида белгиланган тўғри алоқа линиясидан фойдалана бошлагани сабаб бўлди. 2024 йил бошидан буён Telegram веб-сайтини кўрган ёки Googleʼда “Ҳуқуқни муҳофаза қилиш органлари учун Telegram Европа Иттифоқи манзили”ни қидирган ҳар бир киши ушбу алоқа нуқтаси ҳақидаги маълумотларга очиқ бўлади”, — дейилади баёнотда.

Шунингдек, Дуров чалкашликни камайтириш учун мессенжер ўтган ҳафтада турли мамлакатларда махфийлик сиёсатини соддалаштиргани ва бирлаштирганини маълум қилди.

“Аммо бизнинг асосий тамойилларимиз ўзгармади. Биз ҳар доим улар эркинлик ва шахсий ҳаёт қадриятларимизга зид бўлмаса, тегишли маҳаллий қонунларга риоя қилишга интиламиз. Telegram фаоллар ва оддий одамларни коррупциялашган ҳукуматлар ва корпорациялардан ҳимоя қилиш учун яратилган. Биз жиноятчилар платформамизни суиистеъмол қилишларига ёки адолатли судловдан қочишларига йўл қўймаймиз”, — дейилади Дуровнинг 2 октябр куни эълон қилган постида.

Павел Дуров август ойининг охирида Париж аэропортида қўлга олинганди. У уюшган жиноятчилик билан боғлиқ жиноятларда, жумладан, гиёҳванд моддалар ва болалар порнографиясини тарқатишда иштирок этганлик ҳамда ваколатли органларга маълумот беришдан бош тортганликда айбланган эди. Ҳибсга олинганидан кейин бир неча кун ўтгач, Дуров гаров эвазига қўйиб юборилди.

Кейинроқ Павел Дуров мессенжер фойдаланиш шартлари ва махфийлик сиёсати ўзгарганини, ушбу сиёсатни бузганларнинг телефон рақамлари ва IP-манзиллари қонуний талабларга жавобан тегишли органларга ошкор этилишини маълум қилди.

Шунингдек, халқаро нашрлар мессенжер нафақат Франция, балки бошқа давлатлар билан ҳамкорлик қилиб, уларнинг ҳуқуқ-тартибот идоралари сўровига кўра маълумотларни тақдим қила бошлаганини ёзди.