4 августга ўтар кечаси дунёнинг турли мамлакатларидаги фойдаланувчилар Telegramʼни App Store орқали юклаб олиш имконияти йўқолганини пайқади. Илова қидирув натижаларида кўринмай қолган, тахминан икки соат ўтгач эса яна дўконда пайдо бўлган.
Reuters агентлиги Telegram вакилларидан изоҳ сўраган. Компания илова ҳақиқатдан ҳам қисқа вақт давомида App Storeʼда мавжуд бўлмаганини тасдиқлаб, муаммо тезкорлик билан бартараф этилганини билдирди.
«Telegram App Storeʼга қайтарилди ва яқин вақт ичида барча фойдаланувчилар учун яна тўлиқ очилади», — дейилган компания баёнотида.
Apple эса Reutersʼнинг ушбу ҳолат бўйича сўровига ҳозирча жавоб бермаган.
Бу Telegramʼнинг App Storeʼдан биринчи марта йўқолиши эмас. 2018 йилда ҳам мессенжер Apple дўконидан бир неча соатга олиб ташланган эди. Ўшанда бунга контентни етарли даражада модерация қилмаслик сабаб сифатида кўрсатилган. Telegram ишлаб чиқувчилари филтрлаш тизимини янгилагач, илова App Storeʼга қайта тикланган.
Сўнгги йилларда Telegramʼда контент модерацияси билан боғлиқ эътирозлар кучайган. Францияда айнан шу масала Павел Дуровнинг ушланишига сабаблардан бири сифатида тилга олинган эди.
Шунингдек, 2026 йил июл ойида Россия ҳукумати ҳам Дуровга нисбатан «терроризмга кўмаклашиш» айбловини илгари сурди. Шу асосда у Россияда «террористлар ва экстремистлар» рўйхатига киритилган.
