Тошкентнинг Янгиҳаёт туманида савдо-кўнгилочар булвари ташкил этилади

Дастлабки режага кўра, булвар ўз ичига гастрономик, спорт, савдо ва болалар учун мўлжалланган ҳудудларни олади.

Фото: Тошкент шаҳар ҳокимлиги

Тошкент шаҳрининг Янгиҳаёт туманида савдо-кўнгилочар булвари ташкил этилади. Бу ҳақда шаҳар ҳокимлиги хабар берди ва тадбиркорларни давлат-хусусий шериклиги (ДХШ) асосида барпо этиладиган жамоат савдо-кўнгилочар булварини яратиш бўйича экологик лойиҳада иштирок этишга таклиф қилди.

Қайд қилинишича, булвар болалар билан дам олиш, гастрономия, кўнгилочар тадбирлар ва шаҳар ҳаёти бирлашадиган жой бўлади ва лойиҳа дастлабки режага кўра қуйидагиларни ўз ичига олади:

- гастрономик ҳудуд: қаҳвахоналар, ресторанлар, тез таомлар ва бошқалар;

- спорт ҳудуди: фитнес маркази, баскетбол майдончаси, футбол майдони ва кўча спорти учун бошқа иншоотлар, шунингдек, спорт товарлари дўконлари;

- савдо ҳудуди: кийим-кечак дўконлари, эко бозор ва бошқа савдо бинолари;

- болалар кўнгилочар ҳудуди: батут маркази, ўйин майдончалари ва болалар автодроми.

Лойиҳада Тошкент шаҳри ҳокимлиги билан бирга «Тошкент Инвест компанияси» АЖ ҳам иштирок этади. Объект давлат-хусусий шериклик шароитида инвесторга узоқ муддатга ижарага топширилиши мумкинлиги таъкидланмоқда.