Давлат томонидан қопланадиган йиллик мажбурий “медосмотр”га педагоглар ўз ҳисобидан 140 минг сўм атрофида тўлов қиляпти. Поликлиника ва СЭСдагилар эса тиббий кўрик учун бюджетдан пул ўтказилмаганини айтмоқда. Мактаб, Соғлиқни сақлаш ҳамда Молия вазирликларидан бошқармаларга юборилган хатга кўра, жорий йил кўрик харажатлари учун 71,4 млрд сўм ажратилгани қайд этилган.
“Қачонгача ҳаққимизни олишади?”
Тошкент вилояти Қибрай тумани 9-мактабда ишловчи бир гуруҳ ўқитувчилар мажбурий тиббий кўрик учун пул олинаётганидан норози бўлиб Kun.uzʼга мурожаат қилди. Педагогларга кўра, улар ҳар йили шу муаммо билан юзлашади, аммо ҳолат ўзгармайди.
“Ўтган йили ҳам мажбурий тиббий кўрикдан ўтганмиз, лекин ўшанда ҳам пул тўлаганмиз. Бу йил ҳам поликлиникага бордик, ходимлари қўпол оҳангда карточкани тўлдириб, пул тўлашимизни айтишди. Индамай тўлдириб, анализга борсак, “пул тўламасанг, қонингдан анализ олмайман”, деди. Жаҳлимиз чиқиб, бош шифокорига кирдик, ўқитувчилар учун бепул қилинганини айтдик.
Шифокор бундан хабари борлигини, лекин поликлиникага пул ўтказилмаганини айтди. “РАЙОНО”дан ҳал қилинглар, деди. У ердагилар ҳам ҳал қиляпмиз, ўтказамиз дейишди, шу деганига ҳа, 2 ой бўлиб қолди, ҳали масала ҳал бўлмади. Бу ердан эса СЭС ходимлари “медосмотр”дан ўтишга мажбурлаб, мактабимизга қанчадир жарима ёзиб кетяпти”, – дейди шахсини очиқлашни истамаган ўқитувчи.
“Бу йил кўрикни бошлаган кунимизнинг эртасигаёқ бутун республика бўйича педагог ходимлар бепул тиббий кўрикдан ўтиши ва бунинг учун давлат томонидан пул ўтказилгани бўйича буйруқ [ҳам] чиқарилди. Биз шу ҳужжатнинг ижросини кутдик, ўқитувчилар бепул кўрикдан ўтиш учун 1 ой юрдик. Лекин СЭС ҳам, Қибрай тумани кўп тармоқли поликлиникаси ҳам биздан пул сўрашяпти, пул бермасак анализ олмаслигини, хулоса ёзмаслигини айтяпти. Ўқитувчилар учун кўрик бепуллигини айтсак, “бизгача пул етиб келмаган, бориб юқори ташкилотларга мурожаат қилинглар” дейишяпти.
Кейин 15 нафар ўқитувчи бирлашиб Қибрай тумани мактабгача ва мактаб таълими бўлимига бориб учрашдик, “мактаб бизга рўйхат қилиб берса, пулни ўтказамиз”, дейишди. Бизнинг мактаб рўйхат қилиб берди, лекин мана, 2 ойки натижа йўқ. Банкка борсак, “сизларга пул ўтказилган, сизлар индамасдан пул тўлаганинглар учун “тепадаги”лар билганини қиляпти”, дейди. Биз тушунмаяпмиз, бу ерда молия бўлими пулни еганми ёки "РАЙОНО"?”
