Microsoft Googleʼни ўз бизнесига путур етказаётган «яширин кампаниялар»да айблади

Microsoft компанияси Googleʼни ўзининг регулятор ва сиёсатчилар олдидаги позициясини бузишга йўналтирилган «яширин кампания» уюштирганликда айблади.

Microsoft бош юристконсулти ўринбосари Рима Алайлининг маълум қилишича, Google яширин равишда «Microsoftʼнинг антимонополия органлари ва сиёсатчилар олдида қоралашга, шунингдек, жамоатчиликни чалғитишга қаратилган фаолиятни олиб борувчи» гуруҳни қўллаб-қувватлайди.

«Google ушбу гуруҳни молиялаштириш ва назорат қилишдаги иштирокини яшириш учун кўп ҳаракат қилган. Гуруҳ иш бошласа, Google унинг етакчиси эмас, балки иккинчи даражали иштирокчиси ролига киришга уринади», — дейди Алайли.

Microsoft ушбу гуруҳни астротурфинг бўйича гуруҳ деб атади — йирик корпорациялар бундай гуруҳ ёки ташаббуслардаги иштирокини яшириб, уни жамоатчилик томонидан қўллаб-қувватланадиган ҳаракат сифатида тақдим этади.

Microsoft ҳисоб-китобларига кўра, Googleʼга қарши камида 24 та антимонополия тергови олиб борилмоқда. Алайлининг фикрича, Googleʼнинг иккита асосий мақсади бор: Microsoftʼни ёмонлаш орқали назорат қилувчи органлар эътиборини чалғитиш, шунингдек, ўз ютуқлари асосида рақобатга киришмасдан, тартибга солиш ландшафтини булутли сервислари фойдасига буриб юбориш.