Президент аёллар орасида онкологик касалликларни назорат қилишга доир давлат дастурини маъқуллади

Шавкат Мирзиёев аёллар орасида онкологик касалликларни назорат қилишга доир давлат дастурини маъқуллади. Бу ҳақда президент ёрдамчиси Саида Мирзиёева маълум қилди.

Қайд этилишича, дастур миллий ва халқаро экспертлар жамоаси томонидан бир йилга яқин вақт давомидаги муҳокамалардан сўнг қабул қилинган.

Ушбу ҳужжатга халқаро клиник амалиётлар асос қилиб олинган. 30 ёшдан бошлаб аёллар ҳар 10 йилда инсон папилломаси вирусига тест топшириши, 45 ёшдан 65 ёшгача эса ҳар икки йилда маммографиядан ўтиши керак бўлади. Таъкидланишича, ҳар бир аёл электрон рўйхатга киритилади ва ҳар қандай хавфли ўзгаришлар аниқланганда тизимда «йўқолиб қолмайди».

«Дастур аниқ ҳаракатлар ва даволаш протоколларини ўз ичига олган. Албатта, бу жуда катта қадам ва ушбу ўзгаришлар жараёни шахсан ўз назоратим остида бўлади», — деб ёзади Саида Мирзиёева.

Аввалроқ “Аёллар орасида онкологик касалликларни назорат қилиш тизимини такомиллаштириш чора-тадбирлари тўғрисида”ги президент қарори қабул қилингани тўғрисида хабар берилганди. Унга кўра, тиббиётнинг бирламчи бўғинида 30–65 ёшдаги аёлларнинг электрон базаси (рўйхати) шакллантирилади, уларни тиббий кўрикка таклиф қилиш тизими яратилади.