Дунёдаги энг қиммат 10 та мактаб-интернат: уларда йиллик ўқиш нархи 100 минг доллардан ошади

Мактаб-пансионлар ёки интернатлар тарихан Буюк Британияда кенг тарқалган, аммо бугунги кунда бу модел бошқа мамлакатларда ҳам қўлланади. Дастлаб бундай таълим муассасаларида эркаклар ва аёллар алоҳида ўқитилган, лекин бугунги кунда аралаш тур устунлик қилади, деб ёзмоқда Forbes.

Одатда, интернат кампусида ўқувчилар учун ётоқхоналар бўлади: айрим мактабларда ўқувчилар дам олиш кунларида уйга борса, бошқаларида эса фақат таътилда кетади. Агар дастур болалар боғчаси ёки бошланғич синфлардан бошланадиган бўлса, тахминан 10 ёшгача бўлган болалар ётоқхонада тунамайди, балки оддий мактаблар сингари интернатга қатнаб ўқийди. Бадавлат инфратузилмадан доимий фойдаланиш ўқувчиларнинг имкониятларини кенгайтириб, уларнинг ривожланишини рағбатлантиради.

Нафақат ўқиш, балки яшаш харажатлари қўшилгани туфайли таълимнинг бу тури анча қиммат. Бироқ бу сарф-харажатлар ўзини тўла оқлайди, деб ишонилади. TABS мактаб-пансионлар уюшмаси ўтказган халқаро тадқиқот натижаларига кўра, таълим муассасаси ўқувчида етакчилик қобилиятларини ривожлантиришга ёрдам бергани ҳақидаги фикрга давлат мактаблари битирувчиларининг 52 фоизи, хусусий мактаблар битирувчиларининг 60 фоизи, пансионлар битирувчиларининг эса 77 фоизи қўшилган.

Давлат таълим муассасалари, хусусий мактаблар ва пансионларни тугатган респондентларнинг мос равишда 39, 71 ва 87 фоизи мактаб уларни олий ўқув юртларига тайёрлаганини таъкидлаган. Битирувчиларнинг 23, 36 ва 78 фоизи жамиятдаги мустақил ҳаётга яхши мослашганини айтади. Ўқиш давомида ўз вақтини режалаштириш кўникмасини эгаллаганлар улуши ҳам худди шунча.

Энг қиммат интернатлар рўйхатидан Forbes ва бошқа нашрлар, рейтингларига киритилган ҳамда ота-оналар ва бошқа манфаатдор шахслардан ижобий фикрлар олган мактаблар жой олди. Барча ўқув муассасалари Швейцарияда, гўзал Алп тоғлари, водийлари ва кўллари қўйнида жойлашган. Пансионларнинг деярли барчаси 50 йилдан 150 йилгача тарихга эга бўлиб, кўпларининг раҳбарлари ўн йиллар давомида ўзгармай келмоқда.

Дарслар инглиз тилида олиб борилса-да, ҳар бир пансион ўқувчиларга бошқа хорижий тилларни ўрганиш имкониятини тақдим этади. Бу мактабларда одатда бир мамлакатнинг элликдан ортиқ фуқаролари таълим олади, бироқ айрим мактабларда битта мамлакатдан келган болалар сони 10 фоиздан ошмаслиги белгиланган. Ўқув режасида одатда турли таълим тизимларининг талаблари инобатга олинади. Ҳар бир пансион дунёнинг турли мамлакатларидаги олий ўқув юртларига кириш учун зарур бўлган халқаро ва минтақавий имтиҳонлар ўтказади.

Барча мактаблар халқаро бакалавриат дастури асосида фаолият юритади. Уларда юзлаб ихтиёрий курслар, ўнлаб спорт турлари мавжуд. Айниқса, қишки ва тоғ спорт турларига алоҳида эътибор қаратилади. Пансионатлар бутун дунё бўйлаб сайёр тадбирлар ўтказиб, ўқувчиларга турли фаолият соҳаларида ўзларини синаб кўриш имкониятини беради. Таътил вақтида ёзги оромгоҳлар уюштирилади. Битирувчилар клубларга бирлашади ва баъзан янги авлод ўқувчилари билан дарс ўтказиш учун ўз мактабларига қайтиб келади.

1.    Institut auf dem Rosenberg

·        Жойлашган жойи: Санкт-Галлен, Швейцария

·        Ўқиш нархи: йилига 170 318 доллар

·        Ташкил этилган йили: 1889

·        Ўқувчиларнинг ёши: 6-18 ёш

·        Ўқувчилар сони: 230 нафар

Оилавий бошқарув остидаги пансион мактаб фанларининг энг бой танлови, ривожланган инфратузилмаси ҳамда яшаш ва таълим олиш учун аъло шароитлари билан машҳур. Синфдаги ўқувчилар сони ўртача саккиз нафар бўлиб, бир ўқитувчига икки ўқувчи тўғри келади.

2.     Institut Le Rosee

·        Жойлашув: Рол ва Гштаад, Швейцария

·        Ўқиш нархи: йилига 158 580 доллар

·        Ташкил этилган йили: 1880 йил

·        Ўқувчилар ёши: 8-18 ёш

·        Ўқувчилар сони: 420 нафар

Швейцариядаги энг қадимий халқаро пансионлардан бири икки кампусга эга: ёзги кўл бўйи ва қишки тоғ ён бағридаги иккала кампус ҳам ҳашаматли ҳудудда жойлашган. Бу ерда президентлар ва қиролларнинг ворислари таълим олади. Мактабнинг академик стандартлари ўта юқори даражада.

3. Collège Alpin Beau Soleil

·        Жойлашув: Виллар-сюр-Оллон, Швейцария

·        Йиллик ўқиш нархи: йилига 143 000 доллар

·        Ташкил этилган йили: 1910 йил

·        Ўқувчиларнинг ёши: 11-18 ёш

·        Ўқувчилар сони: 300 нафар

Ҳип-ҳопдан тортиб қандолатчиликкача, мунозара санъатидан қушларни кузатишгача бўлган деярли 100 хил тўгарак ўсмирларга турли хил қобилиятларини ривожлантириш имконини беради. Мактаб ўқувчиларга ўзини қизиқарли соҳаларда синаб кўришни таклиф этади: кечаси тоққа чиқиш ёки ярим марафонда югуриш, эфиопиялик деҳқонларга қаҳва теришда ёрдам бериш ёки Патагония дарёларида солда сузиш каби тажрибалар.

4. Aiglon College

·        Жойлашув: Шезер, Швейцария

·        Ўқиш нархи: йилига 140 845 доллар

·        Ташкил этилган йили: 1949 йил

·        Ўқувчиларнинг ёши: 7-18 ёш

·        Ўқувчилар сони: 400 нафар

Пансион ўқувчилари албатта пиёда юриш ва елканли қайиқларда саёҳатга чиқади. Уларнинг жисмоний кўникмаларини саргузаштчи Беар Гриллс ва “Манчестер Сити” жамоаси футболчилари қўллаб-қувватлайди. Ётоқхонадаги шароит анча оддий, кун пухта режалаштирилган: бу мактабнинг қиммати ҳашаматда эмас, балки юқори таълим стандартларида.

5. La Garenne International School

·        Жойлашув: Шезер, Швейцария

·        Ўқиш нархи: йилига 130 531 доллар

·        Ташкил этилган йили: 1947

·        Ўқувчилар ёши: 4-18 ёш

·        Ўқувчилар сони: 160 нафар

Яқин вақтгача фақат бошланғич ва ўрта синфлар учун мўлжалланган пансион халқаро бакалавриат дастури асосида фаолият юритмасди. ХБнинг илк битирувчилари 2023 йилда тамомлади. Таълим инглиз ва француз тилларида олиб борилади. Ўқувчилар Коста-Рика ва Таиландга саёҳат қилади ҳамда Ўрта ер денгизи бўйлаб круизларда иштирок этади.

6. St. George’s International School

·        Жойлашув: Монтреух, Швейцсария

·        Ўқиш нархи: йилига 126,516 доллар

·        Ташкил этилган йили: 1927

·        Ўқувчиларнинг ёши: 1,5-18 ёш

·        Ўқувчилар сони: 480 нафар

Фарзандини бир ярим ёшиданоқ икки тилли француз-инглиз муҳитига сингдиришни истаганлар бу ерга болани бериш мумкин. Дунёнинг 60 дан ортиқ энг нуфузли университетлари вакиллари ҳар йили мактабда таълим ярмаркасини ўтказади, бу эса ўқувчиларга келажакдаги таълим йўналишини танлашда ёрдам беради.

7. Leysin American School

·        Жойлашув: Лезен, Швейцария

·        Ўқиш нархи: йилига 119 375 доллар

·        Ташкил этилган йили: 1961 йил

·        Ўқувчилар ёши: 12-18 ёш

·        Ўқувчилар сони: 300 нафар

Битирувчилар, Америка ўрта мактабини тамомлаганлик тўғрисида сертификат ҳам олади. Консултантлар уларга АҚШ ёки бошқа мамлакатларнинг энг яхши университетларида ўқишни давом эттиришга ёрдам беради. Мактабнинг концерт залида атоқли мусиқачилар мунтазам равишда чиқиш қилади.

8. Collège du Léman

·        Жойлашув: Версуа, Швейцария

·        Ўқиш нархи: йилига 112 476 доллар

·        Ташкил этилган йил: 1960

·        Ўқувчиларнинг ёши: 2-18 ёш

·        Ўқувчилар сони: 1800 нафар

Пансионда яшаш ҳам, қатнаб ўқиш ҳам мумкин. Ўқувчилар фан ва санъат бўйича репетиторлар, шунингдек, шахсий мураббий билан якка тартибда шуғулланиши мумкин. Мактаб Массачусетс технология институти, Жилярд мактаби ва ЮНИСЕФ билан эксклюзив ҳамкорлик ўрнатган.

9. Le Régent International School

·        Жойлашув: Кран-Монтана, Швейцария

·        Ўқиш нархи: йилига 104 700 доллар

·        Ташкил этилган йили: 2015 йил

·        Ўқувчилар ёши: 5-18 ёш

·        Ўқувчилар сони: 260 нафар

Рўйхатда келтирилган мактабларнинг энг ёши. Шунингдек, у энг баланд тоғ ҳудудида —денгиз сатҳидан 1500 метр юқорида жойлашган. Асосий эътибор француз тили ва маданиятини ўрганишга қаратилади. Пансион Institut Le Росей билан яқиндан ҳамкорлик қилади.

10. TASIS The American School in Switzerland

·        Жойлашув: Монтанёла, Швейцария

·        Ўқиш нархи: йилига 104 044 доллар

·        Асос солинган йил: 1956

·        Ўқувчилар ёши: 3-18 ёш

·        Ўқувчилар сони: 750 нафар

Америка университетларига тайёрлайдиган Европа мактабларининг энг қадимгиси. Ўқувчиларнинг тахминан учдан бир қисми кампусда истиқомат қилади. Дарслар инглиз ва италян тилларида олиб борилади.