ЕИ АҚШдан Газпромбанкка қарши санкцияларни юмшатишни сўради

Европа Иттифоқи Қўшма Штатларга босим ўтказиб, Россиядан Европа Иттифоқи мамлакатларига газ етказиб бериш учун тўловларда муҳим рол ўйнайдиган Газпромбанкка қарши санкцияларни юмшатиш йўлларини топишни сўрамоқда. Бу ҳақда 6 декабр, жума куни Bloomberg манбаларига таяниб ёзди.

Bloomberg суҳбатдошларига кўра, Брюссел ва Вашингтон жазони юмшатишнинг «тури ва кўлами»ни муҳокама қилишни Европанинг айрим ҳукуматлари ва компаниялари Газпромбанкка қарши санкциялар минтақага узлуксиз газ етказиб бериш учун хавф туғдириши ҳақида огоҳлантирганидан сўнг бошлаган.

Музокаралар чоғида, хусусан, Россия гази учун тўловларни Люксембургдаги Газпромбанк шуъба корхонасига ўтказиш қонунийми ёки бошқа каналлардан фойдаланишга арзийдими, деган савол кўриб чиқилмоқда, дейилади агентлик хабарида.

Bloomberg хабарига кўра, мунозаралар Россия президенти Владимир Путин Россия гази учун тўловлар фақат Газпромбанк орқали амалга оширилиши ҳақидаги талабни бекор қилганидан бери давом этмоқда. Путиннинг янги фармони «Европа газ бозорини тинчлантирган» бўлса-да, бу Европа Иттифоқи молия институтларини «ҳуқуқий хавфлар бўйича ноаниқлик» билан қолдирди, дея таъкидлайди агентлик.

Путин РФга газ учун Газпромбанк орқали тўлаш талабини бекор қилди

Россия президенти Владимир Путин фармонни имзолади, унга кўра Россия гази учун тўловлар энди битта аниқ банкка боғланмайди. Тегишли ҳужжат 5 декабр куни ҳуқуқий ахборот расмий порталида эълон қилинди.

Илгари, бундай — ягона — молиявий институт Газпромбанк эди, у икки ҳафта олдин АҚШ санкциялари остида қолди. Шундай қилиб, Путин ўзининг 2022 йил 31 мартдаги фармонига ўзгартириш киритди, унда Газпромбанкка Россия гази учун тўловлар бўйича ягона адресат бўлиш ҳуқуқи берилган. Бундай молиявий операцияларни амалга ошириш учун хорижий харидорлардан рубл ва валютада махсус ҳисобрақамларини очиш талаб қилинди. Санкциялар киритилгандан сўнг, бу ҳисоблар автоматик равишда ўз аҳамиятини йўқотди.

Путиннинг янги фармонида, шунингдек, «учинчи шахслардан» маблағлар хорижий компания томонидан газ етказиб бериш учун тўловни амалга оширишда Россия етказиб берувчиси очган рублдаги ҳисобрақамига ўтказилиши мумкинлиги айтилган. The Bell интернет нашри таъкидлаганидек, газ тўлови мажбуриятларини энди нафақат пул билан, балки «ўзаро қарзларни қоплаш» орқали ҳам тўлаш мумкин.