Абдулазиз Комилов Туркманистоннинг «Ҳурматли эл ёшуллиси» унвони билан тақдирланди

Туркманистон президенти Сердар Бердимуҳамедов Ўзбекистоннинг собиқ ташқи ишлар вазири, айни пайтда президент ҳузуридаги Хавфсизлик кенгаши котиби ўринбосари Абдулазиз Комиловни Туркманистон ва Ўзбекистон ўртасидаги дўстлик ва ҳамкорликни мустаҳкамлашга қўшган салмоқли ҳиссаси учун тақдирлади.

TDH хабарига кўра, унга «Ҳурматли эл ёшуллиси» («Hormatly il ýaşulusy») унвони топширилди.

Президент фармонида Комиловнинг миллий анъаналарни ривожлантириш, ёш авлодни тарбиялаш, сиёсий, иқтисодий, илмий-маданий соҳалардаги ҳамкорликни кенгайтиришдаги хизматлари алоҳида қайд этилган. Шунингдек, шоир Махтумқули Фироғий таваллудининг 300 йиллиги муносабати билан Комилов «Махтумқули Фироғийнинг 300 йиллиги» юбилей медали ва ёдгорлик белгилари билан тақдирланди.