Россия Сурияга буғдой экспортини тўхтатди

Россия буғдой экспортчилари Суриянинг янги расмийлари билан боғлиқ ноаниқлик ва тўловлар кечикиши мумкинлигидан хавотирда, деб ёзади Reuters.

Президент Башар Асад ҳокимиятдан ағдарилганидан кейин Россия Сурияга буғдой етказиб беришни тўхтатди. 13 декабр, жума куни Reuters агентлиги Россия ва Сурия манбаларига таяниб, россиялик экспортёрлар янги ҳукуматга оид ноаниқлик ва тўловлар кечикиши мумкинлигидан хавотирда эканини ёзди.

«Ўйлайманки, ҳозирги шароитда ҳеч ким Сурияга буғдой етказиб беришга журъат эта олмайди», деди Reuters агентлигига россиялик манба.

Сурияга буғдой олиб кетаётган икки кема манзилига етиб бормади

Шу билан бирга, Россия буғдойини Сурияга олиб кетаётган иккита кема ўз манзилига етиб бормади, деб ёзади агентлик юк ташиш маълумотларига таяниб. Улардан бири — «Михаил Ненашев» Сурия қирғоқларида турибди, иккинчиси — «Альфа Гермес» Сурия қирғоқларида бир неча кун тургандан сўнг Мисрнинг Искандария портига йўл олмоқда.

Суриялик манбанинг Reuters агентлигига айтишича, кемалар тўловлар бўйича ноаниқлик туфайли кечиктирилган ва Россия Суриянинг янги расмийлари билан бу масалани муҳокама қилган.

#Сурия #буғдой