Яқин вақтлар ичида Европада қишки трансферлар даричаси очилади. ОАВда ҳар куни эҳтимолий келишувлар ҳақида хабарлар чиқиб турибди. Январда кимлар клубини ўзгартиради? Қуйидаги материалда — эҳтимоли юқори бўлган трансферлар ҳақида.
«МЮ» Рэшфорд билан хайрлашади
Аллақачон 27 ёшни қоралаган Маркус Рэшфорд «Манчестер Юнайтед»нинг янги бош мураббийи Рубен Аморим билан чиқишиб кета олмади. Португалиялик мутахассис вингернинг футболга жиддий муносабатда эмаслигидан норози. Шу туфайли Аморим Маркусни таркибдан чиқарди, у охирги ўйинлар қайдномасига ҳам киритилмади, «МЮ» раҳбарияти ҳам ўз тарбияланувчиси билан хайрлашишга тайёр. The Guardian хабарига кўра, клуб Рэшфордни трансферга қўйган ва январдаёқ сотилиши мумкин — бу қарорни Аморим ва клуб раҳбарларидан бири Жим Рэтклифф келишган ҳолда қабул қилган. «МЮ»дагилар ушбу футболчининг кетиш вақти келди деб ҳисоблашмоқда.
Бир неча йил муқаддам Рэшфордга «ПСЖ» жиддий қизиққан ва вақти-вақти билан бошқа эҳтимолий харидорлар ҳам пайдо бўлиб турганди. Аммо энди унинг учун навбатда турганлар кўп эмас. The Telegraph хабарига кўра, ҳали 27 ёшда бўлган Маркусга Саудия Арабистони клубларидан қизиқиш мавжуд. «Ал-Иттиҳод», «Ал-Ҳилол», «Ан-Наср», «Ал-Аҳли» ва «Ал-Қодисия» каби клублар уни таркибида кўришга қарши бўлмайди. Футболчининг ўзи эса ҳозирча Европани тарк этишни режалаштирмаган. Аммо у шу қишда кетмаса, бир ярим йилини ва спорт формасининг қолганини ҳам йўқотади.
Виктор Дёкереш қаерга ўтади?
Швециялик 26 ёшли ҳужумчи 2024 йилнинг энг яхши тўпурари бўлади. Ҳозирда «Спортинг» форварди йил бошидан буён барча турнирлар дорасида урган голлар сони (миллий жамоадаги натижалар ҳам қўшиб ҳисобланганда) 61 тага етган, йил охиригача эса Португалия чемпионатида «Бенфика»га қарши кечадиган яна битта ўйин бор. Сўнгги ўн йилликда фақат Роберт Левандовски бир календар йилида бундан кўпроқ гол урганди — 2021 йилда 69 та.
Дёкерешнинг натижалари Рубен Аморим кетганидан кейин пасайди, аммо бозорда унга талаб пасайиши даргумон. Виктор Лиссабонда жуда ёрқин ўйнамоқда. Transfermarkt унинг трансфер баҳосини 75 миллион евро қилиб белгилаган, бу нарх ҳозирда марказий ҳужумчига эҳтиёж сезаётган «Арсенал», «ПСЖ», «Реал» ва бошқа катта клубларга қимматлик қилмайди.
Ушбу скандинавнинг номи биринчи навбатда уни жаҳонга танитган мураббийининг янги жамоаси «МЮ» билан боғлашмоқда. Рубен Аморим қишда «Спортинг»дан ҳеч кимни олиб келмоқчи эмаслигини айтганди, аммо қаторасига уч мағлубиятдан кейин фикрини ўзгартириши мумкин. Лекин жамоада бу позицияда Ҳойлунд ҳам бор. Нима бўлганда ҳам Дёкереш шу қишда Европадаги асосий лотлардан бири мақомида бўлади. У барибир қаергадир ўтади. Ҳозир бўлмаса, ёзда аниқ.
Мавзуга оид
Пепга ёрдам борадими?
ESPN хабарига кўра, январ ойида «Манчестер Сити» яримҳимоячи олиши аниқ. Хосеп Гвардиола жароҳат туфайли мавсум охирига қадар Родрининг хизматларидан фойдалана олмайди. Мураббий янги футболчига муҳтож. «Манчестер Сити» учун иккита асосий вариант — Мартин Субименди («Реал Сосиедад») ва Бруно Гимарайнс («Нюкасл»).
Transfermarkt унинг трансфер баҳосини 60 миллион евро қилиб белгилаган. У ёзда «Ливерпул»га ўтиш таклифини рад этганди, аммо мерсисайдликлар ундан ҳали умид узишмаган. The Telegraph хабарига кўра, «шаҳарликлар» январ ойида биринчи бўлиб таклиф юборади. Унга «Реал» ва «Арсенал»дан ҳам қизиқиш мавжуд. Трансфер муқаррар. Фақат 25 ёшли ушбу футболчи қачон ва қаерга кетиши аниқ бўлиши қолган.
«Манчестер Сити» марказий ҳимоячи, форвард ва ўнг қанот ҳимоячиси сотиб олиш вариантларини ҳам кўриб чиқмоқда. Аммо биринчи навбатда — яримҳимоя чизиғи учун футболчи керак. Аммо топ даражадаги яримҳимоячи трансфери амалдаги чемпионлар учун мавсумни қутқариб қолишга ёрдам берадими?
«Ливерпул» ҳимоя қанотини мустаҳкамлайдими?
Трент Александер-Арнольд «Ливерпул» билан муддати 2025 йил ёзида тугайдиган шартномасини узайтирмаяпти. Томонлар ўртасидаги музокаралар қийин кечмоқда, ҳимоячига Мадриднинг «Реал» клуби талабгор. Катта эҳтимол билан, Трент ёзда қадрдон клубини тарк этади. «Ливерпул» эса аллақачон унинг ўрнига футболчи топган. Bild хабарига кўра, мерсисайдликлар «Байер» ҳимоячиси Жереми Фримпонгнинг агенти билан алоқага чиққан. 24 ёшли нидерландиялик ўнг қанот учун яхши номзод.
The Athletic қайд этишича, «Ливерпул» Алфонсо Дэвис учун ҳам курашда. Канадалик ҳимоячи ҳали «Бавария» билан шартномани узайтириш ёки ёзда эркин агент сифатида жамоасини алмаштириш танловлари бўйича бир қарорга келмаган. У — «Ливерпул» учун чап қанот позициясига идеал вариант.
Инглиз топ-клуби радаридаги яна бир футболчи — Райан Шерки. Инсайдер Фабрицио Романога кўра, «Ливерпул» скаутлари «Лион»нинг бир неча ўйинига ташриф буюриб, 21 ёшли французни кузатишган.
Артета ниҳоят топ-форвард оладими?
«Арсенал»да айниқса бу мавсумда топ «тўққизлик» йўқлиги панд бермоқда. Кай Ҳаверц — юқори савиядаги футболчи, аммо у классик марказий форвард эмас. «Арсенал» хўжайинлари ушбу позиция учун футболчи олиш ҳақида ўйлашмоқда. TEAMtalk хабарига кўра, лондонликлар 24 ёшли Душан Влаҳовични 2025 йил январидаёқ сотиб олмоқчи. 24 ёшли серб эса — арзон лот эмас. Transfermarkt бўйича унинг трансфер баҳоси — 60 млн евро. Лондон клуби «Нюкасл»да ёрқин мавсум ўтказаётган швециялик 25 ёшли Александер Исакка ҳам жиддий қизиқмоқда, аммо клуби уни осонликча қўйиб юборишга рози эмас ва уни шу қишда қўлга киритиш учун «тўпчилар» рад этиб бўлмайдиган таклиф беришига тўғри келади.
Шунингек, «Арсенал» чап қанот ҳимоячиси билан ҳам хайрлашади. The Athletic Киран Тирни клубни тарк этиши ҳақида хабар берган. У эркин агент сифатида «Селтик»ка қайтиши мумкин. «Арсенал» у билан шартномани узайтириш бўйича бандни фаоллаштирмаган, клубда бу позицияда етарлича футболчи бор (Калафиори, Люис Скелли, Зинченко, Томиясу).
Френки де Йонг аросатда
Нидерландиялик яримҳимоячи Каталонияда ўйнаб кетолмади. Де Йонгнинг савиясига шубҳа йўқ, аммо доимо нимадир халал беради. Масалан, жароҳатлар. 2023 йил бошидан буён Френки 296 кунни жароҳатлар туфайли ўтказиб юборган.
Флик эса уни асосий таркибда кўрмаяпти — 27 ёшли футболчи бу мавсумда атиги икки бор бошланғич таркибда тушди, германиялик мутахассис нисбатан ёшроқ бўлган Педри ва Касадога ишонч билдирмоқда. Узоқ муддатлик даволанишдан қайтган Гави ҳам ундан кўпроқ ўйнамоқда. Бу билан футболчининг йирик миқдордаги маоши эса ўзгармайди — йилига 19 миллион евро. Нидерландиялик футболчининг «Барселона»дан кетиши барча учун фойдали бўлади.
Лекин айнан маоши ва трансфер қиймати муаммо бўлиши мумкин. Беш ярим йил муқаддам каталонияликлар Де Йонгни 86 миллион еврога сотиб олишганди. Ўтган муддат ичида унга катта маош тўлаб келишди. Эҳтимол шунинг учун ҳам Френки учун харидор чиқмаяпти. Аммо, бу вақт масаласи, «Барса» эса қийин вазиятда ён бершига тайёр бўлади.
«Реал»га марказий ҳимоячи керак
«Реал» марказий ҳимояси қийин аҳволда. Милитао иккинчи бор хочсимон пайлари узилгани туфайли узоқ муддатга сафдан чиққан, Алаба эса фаолиятини якунлашга қараб кетмоқда. Фақат Рюдигер ҳамиша ўйнашга тайёр — Антонио сўнгги саккиз йил ичида ўйналган дақиқалар бўйича топ-15 футболчи рўйхатидан ўрин олган.
2024 йилнинг иккинчи ярмида немис ҳимоячига гоҳида Тчуамени, гоҳида ёш Асенсио шерик бўлиб тушмоқда ва бу у қадар ишончли кўринмаяпти. Энди жамоа раҳбарияти трансферлар бозорига чиқиши ва Чемпионлар лигасида муваффақиятли иштирок этиш ҳамда ички чемпионатда «Барса» ва «Атлетико» билан рақобатлашишга халал бераётган муаммолардан бирини ҳал қилиши керак бўлади.
Энг кўп муҳокама қилинаётган номзод — Эмерик Ляпорт. «Ан-Наср» томонидан қўйилган қатор тўсиқлар мавжуд. Биринчидан, клуб Европа чемпиони бўлган футболчисини қўйиб юборишни истамайди. Иккинчидан, бунга фақат катта пул эвазига рози бўлиши ммкин. Перес таркибни мустаҳкамлаш учун Европада ўйнамаётган футболчига керагидан кўпроқ пул тўлашга тайёрми?
Погба ўзига клуб топадими?
Пол Погба «Ювентус»ни тарк этган. 2023 йил октябридан буён расмий ўйинлардан майдонга тушмаган ушбу француз дисквалификация муддати тугаши муносабати билан 2025 йил мартида майдонга қайтиши мумкин бўлади. Январдан эса машғулотларни бошлаш мумкин. Бундай даражадаги текин яримҳимоячи кимгадир керак бўлиши тайин. Бразилиядаги Bolavip нашри ёзишича, мартда 32 ёшда бўладиган Погба «Коринтианс»га ўтишга розилик берган. RMC Sport эса «Марсел»дагилар ушбу футболчини трансфер қилиш ҳақида ўйлаётганини хабар қилмоқда. Погба учун бу клубга ўтиш Франция миллий жамоасига қайтиш имкониятларини ошириши мумкин. Аввалроқ Англиядаги нашрлар Полни «Манчестер Сити» билан боғлашганди, аммо инсайдер Фабрицио Романо бу маълумотни рад этди.
Жамоа собиқ сардорининг қолиши учун сабаб қолмаган, буни Энцо Маресканинг қуйидаги иқтибоси тасдиқлайди: «Унда позиция танлаш бўйича муаммолар бор. Ҳар куни шуғуллансанг ва ўйин амалиётига эга бўлмасанг, бу футболчи учун ҳам, мен учун ҳам ёмон. Яхшиси, ўйин амалиётига эга бўлиш учун кетсин».
Бу сафар ҳам икки вариант кўринмоқда: «Ювентус» ва «Вест Ҳэм». Бен жорий мавсумда фақат битта ўйинда майдонга тушган. Ҳимоячи майдонга тушиш учун маоши сезиларли даражада камайишига ҳам рози. У «Стэмфорд Бриж»ни тарк этиши муқаррар.
«Нюкасл» икки топ футболчини кўз остига олган
Журналист Руди Галетти «Нюкасл» Фикайо Томорига қизиқиш билдираётгани ҳақида хабар тарқатди. «Милан» ушбу англияликни энди «дахлсиз» футболчиси сифатида кўрмаяпти. Шунинг учун италянлар таклифлар учун очиқ. Transfermarkt бу марказий ҳимоячини 22 млн еврога баҳолаган.
«Нюкасл» таркибини кучайтириш учун яна бир номзод — Муҳаммад Қуддус. Mirror Football хабарига кўра, «Вест Ҳэм» футболчиси январдаёқ клубини ўзгартириши мумкин. Ганалик 24 ёшли яримҳимоячи учун «Нюкасл»дан ташқари «Арсенал» ва «Ливерпул» ҳам даъвогар. Лекин футболчи айнан «Сент-Жеймс Парк»да кўпроқ ўйин амалиётига эга бўлиши ммкин.
«Ювентус» ёппасига сотиб олмоқчи
Мавсум«Ювентус» учун қийин кечмоқда. Тяго Мотта жамоаси А серияда пешқадам «Аталанта»дан ўн очкога ортда қолиб кетган. Соврин учун курашга қайтиш учун эса янги футболчилар олиб келиш керак бўлади. La Gazzetta dello Sport хабарига кўра, «Ювентус» Жакомо Распадори билан шартнома имзоламоқчи. Туринликлар «Наполи»нинг ушбу ҳужумчисини анчадан буён кузатмоқда. Мотта ҳам футболчига юқори баҳо беради, Жакомони таркибга қўшиб олиш учун клуб келишувга Данило ёки Николо Фажиолини қўшишга ҳам қарши эмас.
Шунингдек, «Юве» «Нюкасл»дан Сандро Тоналини сотиб олиш вариантини кўриб чиқмоқда. Инглизлар яримҳимоячи учун тахминан 55 млн евро сўрайди. Туринга кўчиб ўтиш учун яна бир номзод — Давид Ганцко. «Фейеноорд»нинг словакиялик ҳимоячиси — «Ювентус» учун январдаги устувор вариантлардан бири.
Осимҳен АПЛ клубига ўтадими?
Il Mattino шов-шувли хабар тарқатди: «Манчестер Юнайтед» январда Виктор Осимҳенни трансфер қилиш вариантини кўриб чиқмоқда. Қайд этилишича, манкунианликлар унинг шартномасидаги бадал пулини тўлашга тайёр. Нигериялик форварднинг «Наполи» билан шартномасида 70 млн евро кўрсатилган. Унинг «Галатасарой» билан ижара келишувида эса қайсидир клуб уни сотиб олиш бўйича бандни фаоллаштирадиган бўлса, ижара шартномасини икки томонлама розилик асосида бекор қилиш кўрсатилган.
«Реал» афсонаси Аргентинага бормоқда!
Аргентинадаги асосий спорт нашрларидан бири бўлмиш TyC Sports шундай хабар берди: «Бока Хуниорс» Серхио Рамосни олмоқчи. Ҳозирда 38 ёшли испаниялик эркин агент мақомида. Шу туфайли «Бока» Рамос билан январдаёқ шартнома имзоламоқчи. Жаҳон чемпиони ва Чемпионлар лигасининг тўрт карра ғолиби экзотик лигада ўйнаб кўриши мумкин. Серхио «Реал»дан кетганидан кейин «ПСЖ»да ишлари юришмади ва қадрдон клуби «Севиля»га қайтганди. 2024 йил ёзида эса ушбу клуб билан шартномаси муддати тугаганидан буён жамоасиз қолмоқда.
