Маскнинг ёрдами — миллиардер Калифорниядаги ёнғин ҳудудларига Wi-Fi'дан бепул фойдаланиш имкониятини берди

SpaceX асосчиси ва бош директори Илон Маск Калифорнияда даҳшатли ёнғинлар сабаб интернет ва уяли алоқа хизматидан маҳрум бўлган аҳолига Wi-Fi’дан бепул фойдаланиш учун Starlink сунъий йўлдош тизимларини юборди.

Ўтган ҳафта охирида Маск ёнғин ҳудудида ишлаётган қутқарувчилар ва ўт ўчирувчилар билан учрашган. Шундан сўнг у Лос-Анжелес ва Малибуга Starlink етказиб берилишини эълон қилди. Ҳудудларга Cybertrucks электромобиллари ҳам жўнатилган. Starlink тизимлари ушбу машиналарга ортилган.

Tesla компаниясининг Х ижтимоий тармоғида эълон қилинган постда Starlink интернет хизмати, электромобилларни зарядлаш станциялари ва портатив батареялар билан жиҳозланган саккизта Cybertruck кўчма база сифатида қутқарув гуруҳлари ҳудудларига жойлаштирилгани ҳақида ҳисобот берилди.

Маскнинг айтишича, ушбу Cybertuck’ларнинг баъзилари “яқин бир-икки кунда” мижозларга етказиб берилиши керак эди. Маск улардан узр сўраб, янги машиналар ҳафта охиригача ўз эгаларига юборилишини таъкидлади.

Ўт ўчирувчилар билан мулоқот вақтида Маск ёнғинга қарши кураш учун сув етишмаслигида демократик амалдорларни айблади. Расмийлардан бири эса унга ўт ўчирувчилар жуда кўп сув сарфлаётганини ва тизим талабни қондира олмаслигини тушунтирди.

Лос-Анжелесда ёнғинлар 7 январ куни бошланди ва шиддат билан тарқалди. Ҳозирга қадар камида 24 киши ҳалок бўлган, 12 мингдан ортиқ иншоот ёниб кетган. Президент Жо Байден штатда кенг кўламли офат режимини эълон қилган.